S’gebbt welle, die gehe schaffe und welle die ned welle. Un annere die’s ned müsse. Von letschtere isch de Freddie äuner. Heit isch Mondag un‘ er dabbt zu de Dier naus, guggt sich um und …logisch: Käuner zu sehe, weilse alle schaffe. Mondag isch fier ihn wie Feierdag! Weil, am Wochenend hocke se alle in de Gegend rum un mache Kravall. De Freddie geht uf Spaziergang un dreht sei kläune Runde. Es isch än warme, troggene Herbscht Morjge. Do entdeckter uf’m Gehsteig vor ihm äune von seinere Clique. „O je, grad die!“ Ma kann sich in derre Gegend ned uhbedingt aussuche, mit wem ma so rumhängt. Weil in demm Vierdel schwätzt jeder jeden ah. Abber die Cändy kann ma wirklich ned immer gebrauche. Un scho garnded Mondag Morjge! Seinere Meinung nach, isch die Cändy nämlich blond un‘ bled! Bei derre kommt wirklich alles z’samme! De Name mit eigeschlosse. Un jetzt geht se direkt uf ihn zu. Am liebschte däder sich ins Gebüsch schlage. Aber ohne die do! Eher, um sich zu verstegge. Sie wohnt vier Heiser weider unnerhalb von ihm. Sie grinst. „Jo!“ Sagtse. „De Freddie macht widder d’Gegend uhsicher. Soll ich dich ä bissele begleide?“ Er macht die Auge groß, sagt: „Bloß ned, du Gaiß‘ “ Sie guggt ihn mit z’sammegekniffene Auge ärgerlich ah und weist ihn druff hie: „ Des war jetzat net nett g’sagt.“ Und, ums Rumgugge, gebbtse ihm ä Baggewatsch, dass alles waggelt „Pass uf, was d‘ saagsch!“ De Freddie steht starr und wie ah gewurzelt. G’schoggt drehter sich dann bloß noch wortlos rum, und macht sich vom Agger. Er knurrt vor sich hie: „ Die isch soo dabbig und wird glei handgreiflich, wegge nix un‘ widder nix.“: Alla. Er troddelt halt äufach weiter. Und wie er bei’s Kunschners um’d Eck laaft, kommt de „Pascha“ g’loffe. De Pascha isch so en eigebildede Kerle, dasser denn Name ned umsonscht ‘kriegt hat. Er kann au sei Gosch ned halde. Awwer um sei Gosch rum hängt soviel Vollbart, dass ma kaum ebbes von seinere Visage sehe dud. Doch er will ä Schwätzle halde: „Oh de Herr Freddie, de g’schmeidige Um- De-Block-Rum-Schleicher!“ „Jo, babbel ned,“ erwidert de Freddie. „ Du Daagdieb!“ De Pascha grault sich mit seine dreggede Pfote arrogant in sei’m Bart und spottelt: „ Hasch grad äune uf d’Lapp nuff ‘kriegt?“ „Alles was in demm Viertel passiert, wird sofort g’sähne,“ knurrt de Freddie unwillig. Jetzat drehter äufach um. Er hat fier heit die Schnauz voll. Es isch nur G’sindel unnerwegs. Ja, Freddie! In demm Wohngebiet bisch Du ned de Äunzigscht, der nix zum Schaffe hat. Und do kommt, grad in demm Augeblick, die Fra‘ Melzer aus ihrer Hofeinfahrt naus. Sie hat ihren dodahl behinderde Irrehaus-Idiot debei. Der kann sei Gosch ned halde. Der brüllt immer rum un‘ komplett sinnlos. Jetzat ischer jo noch än Junger. Awwer wie solls werre, wenn der mol älder isch? Ma‘ wird ihn wegsperre müsse, denkt sich de Freddie. Ä Brülle, ä Belle, ä Bedrohe! D’Fra Melzer hat so ä Schicksal mid so äm hochaggressive Varriggte ned verdient. S’gebbt ja au psychisch Kranke, die ganz friedlich sin. Awwer seller do isch ä annere Fraktion. Sie gebbt sich jo au immer Müh middem, die Frau Melzer. Sie bleibt ganz ruhig. Dud psychologisch un‘ therapeutisch mid ihm zu spreche. Awwer doch musse ihren Kerle fescht im Griff halde. Weil, wenn der wegrennt, dann kannsch d‘ Bolizei rufe. D‘ Frau Melzer sagt: „Freddie, machder nix drauß‘! Du kennsch’n jo. So ischer halt. Er isch jo bloß laut un macht jo nix“ . „ Wer’s glaabt, wird‘ selig“, denkt de Freddie bei sich. Abba äm Freddie langts allmählich. Er wollt‘ doch bloß e mol ä bissle raus, Frischluft un d’Sonn genieße. Normal isch’s mondags doch immer schee ruhig. Awwer heit? Do hörter sein Name rufe: „Freddiiiiiiiiie!“ Aha! Sei Midbewohnerin daucht uf. „Ich muss ebbe mal fort“, erklärt se in so äm liebe Ton. „Du sehsch heit abba ä bissle g‘stresst aus,“ bemerktse treffend. Und do streicheltse ihm ganz zart de Bagge. Des dud emol gut. Es sin Gottseidank ned nur Wahnsinnige uf de Welt. „D’Frau Melzer isch widder mid ihrem Kläffer Gassi ‘gange, gell? Alleweil kannsch‘ neigehe. Ich häb dir dei Fresse scho na g’stellt, du lieb’s Kätzle, mei Goldschätzle.