Flischtling

Es isch mir ägoal, ob Chrischtus de Suh Gottes waor, wie mei Religion säscht, odder en Prophet wie em Islam. For miesch isch sei Botschaft wischtisch, wu er vor 2000 Joar verkindt hot: „Liebe dein Nächschte wie diesch selwer.“ Un wie die Gleischnisse em Neje Teschtament zeje, isch do nät die Familie gmoant, on net ä „ausgewähltes Volk“, sundern Mensche, die en Not sen und die die Hilfe brauche. Un doäzu ghäre alle Mensche, ob schwarz, weiß odder geel. Un sou stehts ao en unserm Grundgesetz.

Un was passiert heitzutaog unner de Aore vun denne Mensche des chrischtlischen Abendlandes? Vum Krieg Gebeidelte, Kranke un Alte, gschunnene Kinner un vergwaltischte Fraue dut mer mit Stacheldroht und Gwehrer abhalte, zu uns zu kumme, oam vun de reischste Länner vun de Welt, weil mer aogeblisch Ängscht hot vor erre Flischtlingswell wie 2015. Ä Schand isch dess. Däbei häwwe mir des, dank denne viele engagierte Leit, genau wie vun de Merkel aogekindischt prima gschafft – viel besser wie beischspielsweis unser Nachbar, de Franzous. Un, do bin isch mer ganz sischer, mer däte des widder schaffe – net de Staat, awer dess wu mer heit die Zivilgsllschaft nennt.

Un wenn, du werter Leser, mol widder des Elend vun denne kranke Kinder em Stacheldrohzaun vun de Griesche siehscht, dann denk mol drao, was Chrischtus gsaot hot: „Was Ihr dem gringschte meiner Brieder aodut, des hät-er mir aogedau.