De Wettergott hatts werklich gut g’meint g’hätt! Es hat nämlich sellemols, die ganz Woch devor, bloß g’reiert und g’schütt‘. Awwer genau uf de Punkt, am schönschte Dag des Lebens, isch jetzat Sonneschein pur. D’Sonn lacht uf die ganz‘ Stadt nunner, und gradso au uf d‘Yasmin, wie se in ihr’m weiße Brautkleid, uf’m grüne Rase, vor de Handykameras posiert. De Himmel so blau! Awwer soo ebbes von blau!
Nach de Standesamt Hochzeitsprozedur, sin‘ mir alle im Audokorso, un‘ mit laude Hupe, zum Restaurant Rimberger g‘fahre. Än Gourmet Tempel! Weit üwwer die Landesgrenze naus bekannt.
De Lennard hat echt ä gude Figur g’macht. In denne Anzugshose,mid sei’m schicke Sacko! Und üwwer de Wescht, ä ganz feine und noble Seidekravatt. So häb ich denne noch nie g’sehe g‘hätt. Ich sag bloß: Traumhochzeit.
Es wared weiß betuchte Tisch ufg’stellt, mit Gläser für jede Gelegeheit. Sekt und Aperifdrinks zum Zulange. Und Häpple hat’s gegäbbe, ohne Ende, mit Rooschtbeef, Parmaschinke, Hummer und Garnele und g’flammte‘ Lachs. S’Personal vom Rimberger säumt mit äm Berufslächle de ganze Comfort & Z’rück und helft dir im Zurechtfinde. Und än Profi Fotograf isch au engagiert. Er rennt de Momente für die Ewigkeit mit de Videokamera hinnerher.
Ä Sängerin singt in de hellschte Töne. Awwer eher so newwebei, dasses net stört. Sie wird von äm Piano Spieler begleitet. Und alsemol macht se do ä bissle uf sich ufmerksam und nemmt ä Geig‘ in d‘Händ.
S‘ wundert mich als immer widder, wie heitzudag, ganz normale Leit, soviel Pulver in ä Fescht inveschtiere due, als wärre se de Millionär von Hollywood. Ich mäun, de Lennard isch scho seit früher Jugend än Kumpel zu mir. Er stammt aus Middelklasse Verhältnisse und hat sich do au net drüwwer naus katapultiert. Von Beruf isch er Elektriker. Alsemol komme mir zufällig uf ä gleiche Baustell zum Einsatz. Ich mit „Gas Wasser Scheiße“, und er halt uf Strom. Er macht sich die Händ allerdings nimmer schmutzig, weil er so spezielle moderne Steuerunge hochfahre dud.
Üwwer de Lennard lass ich nix komme! Ich häb mir awwer früher scho au ä bissle Sorge um ihn g’macht g’hätt. Wegge sei‘m Umgang in Sache Mädle, halt.
Also, de Lennard isch beim annere G‘schlecht‘ immer sehr beliebt g’wäse! Gar käu Frog!
Ä Frau kann mit ihm üwwer alles schwätze. Er hat nächtelang middem Mädle verzähle könne und mit Emphatie zuhöre. Des kann jo au net jeder! Nur! De Lennard isch g’fühlt, ewig lang Jungfrau gebliewe. Vielleicht hat ihm, als Fraue‘versteher, äufach am End‘, oft de gewisse Sex Appeal g’fehlt. So ä freche Entschlosseheit, mäun ich.
Schlussendlich hatter sich awwer doch noch sei Yasmin g’angelt!
Jetzat stehe mir alle middem Gläsle in de Hand, ebbes Leckers zwische de Finger, und Small Talk. De Lennard hält sogar im Moment ä scheen Red‘, ä Ansprach von de Liebe. 
Und wie mer an gar nix Beeses denkt, machts plötzlich än mörderische Krach! Es klingt nach äm schwere Eise‘gerät. Ä dumpfes Dröhne! Ä metalliges Quiesche und ä Schebbere! Än gewaltige Bagger biegt ums Eck rummenum. Er schafft sich mit sei’m Ketteantrieb – grad wie so ä Urviech‘ – die Ei’fahrt nuff. De gääle Bagger kommt immer näher und halt doch tatsächlich uf uns alle zu.
Kinner rufe erschrocke nach de Mama! S’Lache und s‘Rede erstirbt wie ä Welle am Rheinstrand.
De Bagger wirkt irgendwie awwer au bedrohlich. Des basst net in denne Kontext nei, hat mei Fraa g’sagt. Die isch Erzieherin. Die kennt sich aus.
Was hat do jetzat so ä Gerät zum Suche? Frogt sich ein jeder. Mer hört jo alle naslang schlimme Sache! Die Marktplätz in de Städt‘ sind jo net ummesonscht abg’sichert wie Feschtunge.
Könnt mer noch schnell uf‘d Seit‘ springe, wenn mer merkt, s’werd‘ ernscht?
Die Gläser uf de Tisch‘ zittre vor Erschütterung. Wenn des so weiter geht: mei lieber Herr Gesangsverein!
Jetzat stoppt er awwer, de Bagger. Gottseidank! Uf de Rase fahrt er net druff. Mit de Baggerschaufel halt er än rode Rosestrauß zwische de Eisezähn‘.
D’Yasmin grinst beseelt üwwer alle Backe. Und wie se nach sellem Blumestrauß greife will, öffnet sich die Baggeschaufel so vorsichtig und so zart, als wär’s ä Pinzett‘.
Des sind so Begebeheite, die äum ewig in Erinnerung bleiwe. Und es isch au ä schee Hochzeit g’wäse, muss ich sage.
Später häb ich de Lennard dann awwer echt lang nimmer g’sehe! Bisch‘ emol im Hafe der Ehe g’landet, gehsch nimmer so schnell uf Große Fahrt!
Awwer schließlich, fascht uf de Dag, ä Joahr später, hän mir uns doch tatsächlich widder getroffe. Und natürlich uffere Baustell‘, direkt bei de Büro Container. Es war ä Bullehitz! De Lennard war ganz verschwitzt unner de Achsle von sei’m karrierte Hemd.
Jesses, Ihr Leit! Wie schnell ä Joahr rumgeht!
„Unn? Wie gehters?“ Häb ich ihn g’frogt.
„Heah! Die Hitz‘! Net zum Aushalde!“ War sei Antwort.
„Ha! Ich mäun so im Allgemeine! Gäbbts scho Nachwuchs?“
„Näu“ Sagt er.
„Mir sin getrennt und in Scheidung.“
„Lennard!“ Häb ich erschrocke‘ gerufe.
„Wie – in Gottes Name -kann des passiere?“
„De Fischer!“
Hat er kurz angebunde, mehr gezischt, als g’sproche.
„De Fischer Klaus? Der, wo uf deine‘ Hochzeit, d’Yasmin a’gebaggert hat!“
De Lennard hat bloß g’nickt, mit sei’m weiße Helm uf’m Deez.
Mir kenne jo beide de Fischer noch aus Schulzeite. Ich häb äm Lennard d’Hand freundschaftlich uf d’Schulter g’legt un‘ g’sagt:
„De Fischer wäuß halt uf jedere Baustell‘, wo de Hammer hängt.“