Feschtalarm

S’geht mit Rieseschritte uff Weihnachte zu. Bis geschtern ware noch ganz entspannt. Bis in de Bäckerei oine lamendiert hat, dass mer in dem Johr en viel zu kurze Advent hätte – sie wüsst gar net, wie se des alles schaffe sodd, wo se doch bisher nur drei Sorte Breedlen gebacke hätt! Ich heb me leicht beschämt gfühlt, weil mit drei Sorte Breedlen wär bei mir die ganz Backerei scho gschtemmt gwese – awwer mei Breedlesdose sen noch loddelleer!

Jedenfalls wars aus mit meinere Ruh, un nach eme Blick in de Kalenner herrscht jetzt heut bei mir Feschtalarm! Do kannsch zähle wie’d willsch: ich komm nur uff gute drei Woche Advent, un de Gipfel: de viert Advent isch an Heiligobend! Ja, gebts en so was? So e Kerzelichtverschwendung an oim oinzige Dag! Ich fühl me betroge, ja fascht scho beraubt un de innere Zeitmänätscher tobt uff Hochtoure: Fenschter butze, weil du kannsch doch koine Sternlen an dreggiche Scheibe hänge; d’Weihnachtsdeko gleichmeesig üwwer s’ganze Haus verdoile, Gschenklen aussuche, s’Weihnachtsesse plane, Karte schreibe, Karte fers Weihnachtskonzert abhole un was wars en noch alles? Ach ja: drei Sorte Breedlen backe…..un des alles in dere ultrakurze Adventszeit!

An dere Stell unnerbrecht mei Freundin am Telefon des Gjammer:“ Was regsch de denn so uff? De Dezember hat au diesjohr widder 24 Dääg bis Weihnachte! Was isch oigentlich dei Problem?“  Ich kontrolliers im Kalenner un sie hat Recht: do stehe exakt 24 Dääg drin – so wie jedes Johr! Erleichtert sink e in mein Sessel, trink en große Schluck Wintertee un freu me üwwer des uverhoffte Zeitgschenk.