Ferz helfe net………
„Ferz helfe net, wenn de Kittel brennt“
Des war en weiser Schbruch, wenns arg haiss hergange isch.
Un so isches jo laider efder in unsere facking Zeitlaif.
Ii glaab als, dass die Regierung schun gwisst hod,
dass mit de gschichtliche Endwigglung vun Berlin
en Haufe Sache entschdanne sin, die wo blos schdeere
un oifach ned zu ennere sinn.
Inzwische sin se zu so ere Art schwarzes Loch worre,
wo oifach jede Menge Geld drin verschwind..
Laider isch der Zuschdand awwer scheints ohschdeggend,
un alle in dem Schdaad henn se mehner Schulde als wie en Hund Fleh.
Nadierlich welle jetzerd aa alle den Fiskus redde un moine, es ging,
wenn se alle meh Ohschbrich schdelle un zu allem Schbare noisage.
Jetz sen se druffkumme, dass mer mol ned blos bei de Kloine schbare sot,
sondern erschder mol bei de Grosse.
Dodebei kenneder mol seh, ob bei eich aus de Schul no rechne iwwerich bliewe isch,
bei de Bolidiger moint mer als schun mol, dass se ewich lang aus de Schul sin.
Also welle mer e mol e paar Milliardärbeischbiele rechne.
Vun oiner Milliard soll der also zum Beischbiel 10 Brozend hergewe. Des wäre
dann10 Brozend vun dausend Millione oder hunnerd Millione, dädem also
naihunnerd Millione bleiwe. Des wär riwwer un niwwer en scheener Brogge.
Mer kann ah annerschd rechne, vielleicht mid Schulkenntnisse. Mol seh, wie
des aussehd. Mir wisse alle, dass die Nulle nix Wert sin un sage dem Milliardär,
dass mir vun ihm blos oi oinziche Null welle, die Hinnerschd.
Er hod immerhie nai Schdigg hinner dem Oinser.
Werd er eischlage un des dolle Ohgebot ohnemme?
Also rechne mer emol.
Er hot also nai Nuller hinner seim Oinser un gebt oiner her, Dann hot er immerhin
noch acht Nuller hinner seim Oinser. Schreiwe mers mol als Zahl:100.000.000
oder vorher: 1.000.000.000. Er hod also noch Hunnerd Millione
un muss naihunnerd Millione hergewe.
Mer seht, net alles was schee aussehd, isch a schee.
Un scheldet nemme so iwwer die Mathe, manchmol braucht mer se.
OA0523
Des war jedds ä brihma Inschbiraddsiohn ferre Haiguuh.
Desdrum – so under Schriffdschdella – erschdmohl Dangkscheen. ,-))
Awwer dann hawich nochemohl an de Ahnfang gerolld.
Und sidderhähre fröuw ich mich: Wann Firz nidd hälfe, was hilfd dann?
Hallo Hartmut,
i glaab, ’s isch a die Froog‘, was’fer „Ferz“ odder „Firz“ (wie Du schreibsch) de Otto demit moant … (?)
( – Otto, sag Du’s uns: isch’s ’s Bleedsinn mache odder was ? -)
Awwer jetzt froog i Dich noch, Hartmut: kennsch Du noch en annere 96jähriche, wu vun“facking Zeitlaif“ schwätzt ? So ebbes kann blooß vum jung gebliwwenne Otto kumme !
Hallo Angelika.
Nääi, 96jährichi känn ich zur Dsitt iwwerhööbd nid. Awwer ich winsch mir schun, dass ich mit seggseninndsich noch soh alwere (un fidd ) bin, dass ich gährn Wortwidds mach ;-))
Jaja, die Ferz. Des sen die nixnutzische Luftbloddere, wo manche Herner vun sich gewe, weil die so wichdich wäre un sei missde. Werkle sins awwer blos so Sache wie Saifeblose ohne Saif. Frieher hot mer aa noch gmoind, dass se gfährlich sin, wenn se rumple, weil se dann eckich sin. Bsunnere Kinschdler, sagde se, kenne se aa and Wand nagle, wenn se großkopfede Nehgl hen.
Hewe jezterd alle Klarhaide bseidichd?