Es gabat a Leich

Wer kennt se net, d’Fraa Schtockl, die Dratschbaas von de Rosehaim Cops! Jeden Dag kurz
nach de Viere sagt se: “Fassen Sie nichts an, wir kommen”.
Des isch ainer von de harmlose Krimis, wo nur ai Leich drin vorkommt, net so wie beim Barnaby,
der’s net unner Viere macht. Odder wie bei de Zürich-, Kroaten- odder was-weiß-ich-wo-noch-
Krimis, die immer brutaler werre un die mir scho lang nimmeh agucke.
Dann doch lieber die Rosehaimer Cops mit dem Zickekrieg zwische de Schtockl un de Ortmann,
mit de schtändig wechselnde Kommissare, die bei de Fraa Hofer uffem Baurehof wohne, beim
frühschtücke immer gschtört werre un zu schpät komme, weil ene ‘s Auto verreckt isch. Die
Gschichte sin aigentlich immer gleich, wenn die aine gsehe hasch, waisch, was in de annere
bassiert un trotzdem wird jeden Dag um Viere pünktlich zum Middagskaffee die Glotze eigschaltet
un Rosehaim Cops geguckt. Pünktlich zwai Minute vor em Schluss haißt’s dann: “Ich verhafte Sie
wegen Mordes an ….”
Übrigens …. mei Fraa hat’s eher mit de Rentner Cops.