En gschenkte Gaul

Silveschter fünf Minudde vor de Zwölfe. D’Sektgläser sen scho gfüllt, de Manne hat grad e Abschussramp für sei Rakete gebaut – vielleicht die letscht, wenn des dann au noch verbodde werd. D’Inge fangt a de Countdown runner zu zähle, do ruft d’Annegret: “Halt, send doch emol still! Ich glaub, s’hat an de Dür geklingelt!“ „Ach was, des was du hörsch, des sen doch d’Kircheglocke!“ De Hausherr geht dann awwer doch nochgugge un uff oimol werds ganz still im Zimmer. Von dem wu geklingelt hat isch nix mee zu sehe, awwer uffem Fußabtreter vor de Dür steht e riesigs Paket.

„Vun Amazon kann des awwer net sei, die lieffere um die Zeit nimmee!“      „Ich nemm nix, was e net bschtellt heb!“      „Awwer do steht koin Absenner druff, dann kannsch au koi Retoure mache!“        Jeder in de Runde hat ebbes zu vermelde. S’Döchterle vum Haus hats dann als erschte erfasst: “Des isch jo e Gschenk!“ ruft se un kriegt en gierige Blick. Mit Gschenklen kennt se sich aus, Weihnachte isch jo noch net lang her! Un jetzt sehe’s au endlich die Erwachsene: s’isch tatsächlich e Gschenk! E seltsams un leicht ramponierts vielleicht, awwer doch unverkennbar. S’Eiwickelbabbier isch nur aus läddiertem, braunem Packbabbier, awwer des ziemlich verrupfte Schlüpfel drum, des gebt en eindeutige Hinweis. Vielleicht e verspätets Weihnachtsgschenk?

„Jetzt packs doch endlich aus!“ ruft de Manne ugeduldig. Seine Rakete hat er ganz vergesse, die schieße jetzt drauße die annere ab. Vorsichtig werds Packbabbier uffgrisse un de Deggel uffgeklappt. Drin liege lauter Päcklen: kloinere un größere, uffgschrammte un schee verpackte, manche nur mit Bindfade zsammegebunne, annere mit Glitzerschleiflen. Seltsam, des alles! Owwe druff liegt e zsammegfaltetes Blatt Babbier un jetzt klärt sich alles uff: des Paket, steht do zu lese, sei des neie Johr un des tät für jeden Monat e Päckle bereithalte un am End von jedem Monat derf des entsprechende Päckle uffgmacht werre.

„Wie abgfahre isch des denn!“ ruft de Manne. „Des isch jo wie en Ganzjohresadventskalenner – bloß dass koine Schoklädlen drin sen! Wer woiß, was fer uverdauliche Brocke sich do drin verschteggle! Gugg doch mol glei, ob de Juli en Trauerflor hat, weil mer d’Fußballeuropamoischderschaft versemmelt hen!“    „Au ja, un gugg doch mol, ob de Mai e blaues odder e rosa Bändele hat!“ kommts von de Inge, die sich uff ihr erschtes Enkele freut. S’Döchterle vom Hausherr will am liebschte glei alle Päcklen uff oimol uffreiße, so wie ses mit ihrm Adventskalenner gmacht hat. Awwer dann erinnert se sich, wie kotzüwwel ihrs hinnerher war un sie lassts liewer bleiwe.

„Ich woiß gar net, ob ich üwwerhaupt wisse will, was do drin isch“, moint de Jochen skeptisch wie immer. „Ach was, eme gschenkte Gaul guggt mer net ins Maul, des werd scho basse! Un so isch halt emol s’Lewe: im Lauf von eme Johr hat vermutlich jeder sei Päckle zu  trage!“ sagt d’Inge um Zuversicht bemüht. Für en Moment hat sich e nochdenkliche Stille uff die Runde glegt. Bis dann d’Annegret die Sach uff de Punkt bringt: „Ja awwer Leut, so en neies Johr –  des isch doch wirklich e Gschenk! E großes Gschenk! Do derf mer doch oifach dankbar sei, egal was in dene Päcklen drin isch! Un jetzt schnappet endlich eure Gläser un lasset uns anstoße, bevor de Sekt so abgstanne isch, wies alte Johr! Alla proscht un e guts Neies!“