(weil’s zeitlich noch basst – Rickblick uff en bsunnere Vadderedag )

E Schdigg Himmel

An Chrischdi Himmelfahrt

de aig’ne Himmelfahrt (noch) drotze

un sechseachtzichjährich

mi’m alde NSU-Drohtesel

wu ma mol vor vor fuchzich Johr

beim Preisangle gwunne ghat hot

u’beschwert un leichtfießich

in de Vadderdag neidrebble

Uff’m Fischerfescht drunne

sich unner d‘ Leit setzte

mit’nanner Schbrich glopfe

en Halwe schbendiert griege

un zum Middagesse uff de nägschd eilade.

Sich iwwer’s  Ur-Enggele fraije

wu oam schun vun weidem zuwinkt

demm e Eis kaafe

un zum Noochdisch noch sich selwer

en Kaffee gunne

un e groß Schdigg  Schwarzwälder dezu.

Mit so’me gfillde Bauch jetzt noch de Ei’fall wohrmache

all denne drumrum ganz in de Neh‘

e gloans Weltwunner  zu bräsendiere

un’enne de dickscht Boamschdommin de ganze Umgewung

zu zeige

Mit ausgschdreggde Ärm  wärd dort Maß gnumme

iwwer finf Meder Umfang bewunnert un beschdaunt

a wa’ma  dodebai bei sich so langsam – oh je, oh je-

’s iwwergangene Middagsdief schbiert…

Sich ein gloane Moment lang bang frooge

ob’s noch mi’m Rad fa hoamwärts langt (?)

Awwer  ma fährt jo dessmol net elloij…

Dann in de Grupp‘

in’erre Kurv‘ grad oimol

de Abschdand net richdich eischätze

’s Hinnerrad vun de junge Vorderfraa schdreffe

un selwer mitsamt derre

vum Saddl falle

Zum Glick

ins hoche Gras

Wie uff Kommando

sich oagugge und laut lache kenne

donn awwer gschwind sich uffrabble

’nanner beischdeh beim Uffschdeh‘

un horddich uffschdeige un weiderdrebble

wii wann nix gwest wär…

Jetz awwer numme ziegich hoamzuus‘

mi’m Wind vun hinne

e’me ganz deewiche Kopf

-Jesses Gott-

un de Daddschkapp em Gnick…

In de aig’ne vier Wänd‘ dann

glei alles mit Schnaps ei’reiwe

wu weh dud

un hundsmied un dodevu ei’gnäwwld

uff d‘ Couch singge

Vun jetzt uff noochher

in de Diefschloof kumme

mi’me Schmunzle im Gsicht

den Ausflug preise

un beim devu Droame

sich heelinge nochemol

e Schdigg Himmel ergaddere…