3. September 2020

E drakdätle iwwer die Licke

Otto Arnold

Kommentare

E drakdätle iwwer die Licke

E Lick isch annerschder als wie e Loch.
Awwer Ähnlichkaide henn se doch.
Bei baide isch was do, was fehld.
Do siehsch du NIX. – Wenn de des quelt,
sag i, des musch du net verschdehe,
denn aigetlich kannsch NIX net sehe.
Dass mer des so richtich schnallt,,
befroge mir die Praxis halt.

E Loch wird als NIX mit me Rand drum beschriwwe,
un bei de Lick geht des NIX blos vun hiwwe bis driwwe.
Jetz moinsch du, des wär alles Bedrug,
weil Licke un Lecher gäbts jo schon gnug.
Zu dem Thema bin e awwer jetz schdill,
weil e blos zu de Licke was sage will.

Hiwwe un driwwe siesch en Boom schdehe.
Dezwische kannsch e Licke sehe.
Des Dumme isch, do hot sich jetzt
noch en Boom dezwische gsetzt.
Die Beem sin also jetz zu dritt,
un bringe drum zwai Licke mit.
Vun vorne kannsch nach hinne sehe,
do sehsch no mehner Beem rumschdehe.
Jetz glaabsch es net, was fer e Glick:
do dezwische isch immer e Lick.
Manchsmol wird die Lick verwischt,
wenn noch en Boom neigwaxe isch.
Un so merksch du werklich bald,
wie des geht in some Wald.
Ineme Wald kannsch nämlich schee
viel Beem so uf me Haufe seh,
un immer sehsch dann aa die Licke.
Nadierlich kanns im Forschd net glicke,
die Licke oifach wegzudricke,
weil sunschd die Beem viel peepter schdehe.
Des muusch dann aa noch annerschd sehe:
denn Has un Reh un wilde Sau
kämde sunschd leicht in en Schdau.
De Wald wär dicht als wie e Wand.
Un desdrum sagt dir dein Verstand:
die Beem muß mer hald weider setze,
un sie mit Licke dann vernetze.
Gucksch awwer mol vum Wald aus naus,
dann sehts scho widder annerschd aus.
Beem siesch do dann aa noch schdehe,
doch du kannsch große Licke sehe.
Die Beem sin alle zu begrieße.
Sie schdraie nämlich Obschd uffd Wiese.

Manchsmol kannsch aa Beemer sehe,
die wo in zwai Raihe schdehe.
Die Licke werrn dord ganz versaut,
wenn mer e Allehschdroß baut.
An de Seit hots dort dann aa sei Ticke,
do sin jo zwische de Beem so Licke.
Leit, wo uff de Schdroß dann rolle,
un se dorch e Lick verlosse  wolle,
merke maischdens viel zu schbät,
dass noch en Boom denewwe schdeht.
Do moine dann die Drepf, die Schlaue:
jetz werre d Beem halt ummeghaue.

Drum duhd mie jetz en Alptraum dricke:
Was bassiert dann mit de Licke?

0 Kommentare

Einen Kommentar abschicken

Deine E-Mail-Adresse wird nicht veröffentlicht. Erforderliche Felder sind mit * markiert.