6. Dezember 2022

Die Zwei Weihnachtsmänner

Buddy Hills

Kommentare

Die Irmi hat de dicke Wintermantel rausg’holt g’hätt, weil, es isch kälter g’worde mid demm Dezember. Sie isch in de Hauptstroß‘ ibber de Zebrastreife g’schlurft. S’Laufe war als schon ä bissle schwer fier sie, wegge de Vene halt. In ihrem Lebe isch sie viel uf de Füß g’wäse, un hat fier’s G’schäft vom Elektro-Kurt, g’fühlt, dausende von Waschmaschine, Mixer, abber au Glühbirne verkaaft. Un jetzat war se mit siebbenesechzig scho ä paar Jahr in Rente un heit uf’m Weg in d’Sparkassefiliale. Ihr Bankcard wollt nimmer richtig mitspiele. Ibbers Telefon mit denne Automatestimme isch se mal garned klar komme, un sie hat sich gedenkt, sie geht persenlich vorbei, irgendebbes wird scho klabbe. Wie se an die drei Stufe vor die Filiale komme isch, hat se sich an demm G’länder ä bissle g’hobe un rechts von ihr hatse Rot g’sähne. Des wared zwei Weihnachtsmänner, mit Bart und Zipfelmitz, un des war ja kai Wunner, weil Adventszeit. In demm Moment, wie die Glastür vor ihr audomadisch uffg’ange isch, un sie am Betrete war, isch äun Weihnachtsmann links von ihr g’wäse un de anner rechts. Un dann hebt ihr de linke Weihnachtsmann ä Pischtol an de Kopf un brillt laut: „Händ‘ hoch! Des isch än Ibberfall! Un wenn sich äuner regt, knalle mir die Omma zu erscht ab.“ D’Irmi war dodahl verschrogge un ihr isch erschtmol garnix mehr ei’gfalle. De Mann am Schalter isch ganz ruhig geblibbe un hat freundlich g’sagt: „ Meine Herre, wie sie an unsere Eingangstür sehe kenne, klebt do än Uffbebber, wo druff steht, dass unsere Geldb’stände durch Zeitschloss g’sichert sin , was bedeute dud, dass wir garned so äufach an unsere Geldb’ständ dra komme kenne.“ Jetzat hat d’Irmi widder ihr Sproch g’funne un hat laut g’schimpft: „Hännd ihr ned s‘ Lese g’lernt, ihr lidderliche Niggolais?“ Die zwei Weihnachtsmänner hän sich geggeseitig ahgeguggt, dann die Irmi un ma hat g’merkt, dasse in ihrer Planung damit jetzt net uhbedingt g’rechent hän. De linke Weihnachtsmann hat dann sei Pistol heftig an die Back‘ von de Irmi gedriggt un g’rufe: „Halt doch äufach dei Lapp!“ Un im weidere Verlauf hatter sich an de rechte Weihnachtsmann g’wendet un g’fragt: „Hasch de Sack startklar?“ „ Hä? Näu!“ Hat de rechte Weihnachtsmann g’sagt. „Ich hebb gedenkt, de Geldsack hasch du“. De linke Weihnachtsmann hat laut g’rufe: „Ich häbb doch de Colt. Also musch du de Sack halde.“ Obwohl jetzat de rechte Weihnachtsmann än große Bart vor sei’m G’sicht g’hat hat un garnet zu erkenne war, hat ma schon merke kenne, dass es ihm ä bissle peinlich bis panisch war. Un dann hatter gebrillt: „Jo Schneider, du bisch halt widder de Besserwisser. De Sack isch im Audi. Abber die hän b’stimmt au än Kartong hier, zum Banknoode eipacke.“ Jetztat konnt ma beobachte, wie de linke Weihnachtsmann sei Fassung am verliere war. „Hasch du dummer Hund jetzat mei Name g’sagt?“ De rechte Weihnachtsmann isch ins Schwitze gekomme, un er hat sei Zipfelmütz runnergezoge, weil de Kopf voller Schweiß war. Er had nämlich käu Haar g’hädd. S’war alles nunner rasiert. Un als Antwort hatter gäbbe: „ Jetzat mach dich ned so rum. Schneider gibts wie Sand am Meer. Wie soll ma do än Kevin Schneider finde?“ Un vollkomme, de Situation unangemesse, hat de rechte Weihnachtsmann de linke Weihnachtsmann ah g’spuckt. D’Irmi, de Sparkassemann, de linke Weihnachtsmann, gugge bloß noch uf de eklige gelbweiße Kodder uf dem rote Mantel. Es war ganz still in de Sparkassefiliale. Drauße uf de Hauptstroß is leise de Schnee g‘rieselt. Un im Schaufenschter von de Apothek‘ geggeübber hän Lichtlen geblinkelt. Uf de Stroß drauße alles friedlich wie Advent, ned emol ä Audo odder ä Mobed. De Kevin Schneider hat jetzat nur noch än Schrei losg’lasse! So ähnlich, wie än Coalabär, wenn de Busch in Auschtralje brennt. Er hat die Irmi von sich g’stoße, un wollt mit seinere Pischtol…Euch kann ich’s ja sage: die war voll unecht …..hatter also mit seinere Pischtol uf de rechte Weihnachtsmann druffhaue welle. Der Kolleeg aber hat blitzg’schwind reagiert und konnt‘ denne Schlag abwehre. Er hat sich dann uf de linke Weihnachtsmann g’stürzt und ihn in de Schwitzkaschte g’nomme, dass demm de Bart abg’risse isch. Sie sin ibbernanner her g‘’rollt. Erscht nach links, dann nach rechts. Als wenige Minute später des Überfallkommando eigetroffe isch, hänn die Polizischte zwei Weihnachtsmänner vor g‘funne, die am Bodde g’legge sin un sich geggeseitig so feschgeklammert hän, dass sich käuner mehr hat bewege kenne. De rechte Weinachtsmann, der jetzat obbe g’hängt isch, hat mit letschter Kraft g’faucht: „Ich bring dich um, Schneider“! Un de linke Weihnachtsmann, der unner seim Mittäter geklemmt isch, hat g’schnaubt wie än Ochs un g’schriee: „ Du bisch so dumm wie dei Mudder!“ Un d’Irmi hat g’staunt un g’sagt: „Isch dess ä B‘scheerung.“ Und weil sie net g’storbe isch, hatse noch ,bis weit ins Neije Jahr nei, viel g’lacht.


3 Kommentare

  1. Angelika

    …un mir henn heit morge a schun was zu lache ghat, Dankschee …un Dir en scheene Nikolaus-Dag…wu net u’bedingt so ablaafe muss wie der bei de Irmi !

  2. Wolfgang Müller

    Was ma newweher erfahrt in so ere Gschicht,
    stellt en weitverbraitete Irrglauwe ins rechte Licht.
    Zumindescht behaupt des der Schmunzelstory – Gstalter:
    S’gebt noch Sparkasse-Filiale mit leibhaftige Mensche hinnerm Schalter…