D‘ Irmi hat sich de dicke Wintermantel ahgezoge g’hätt, weil, es isch kälter g’worre g‘wäßt, in sellem Dezember. In nere regelrechte Christmas Lightshow isch se d’Hauptstroß lang g‘schlurft. Glitzere, Blinkle, Flimm’re und Schimm’re! Die mittlerweile dreiundachtzigschte Weihnachte! Awwer heit uf’m Weg in d’Sparkassefiliale. Ihr neie Bankcard wollt nämlich nimmer richtig mitspiele. Üwwers Telefon, mit denne Automadestimme, isch se mal grad garned klar gekomme, un sie hat sich gedenkt, sie geht perseenlich vorbei. Dass do noch üwwerhaupt ä Sparkass mit ennere leibhaftige Person hinner äm Schalter exischtiert, grenzt jo, in de heutige, digitale, personal-arme Zeite, an e Wunder! Weihnachtszeit? Wunderzeit?
Hoffentlich käu blaues Wunder! Sie hat nämlich Rot g’sähne: Weihnachtsmann, mit Bart und Zipfelmütz.
Awwer Hallo! Do war ned nur äun Weihnachtsmann, es wared sogar zwäu von derre Sort im Schalterraum g’stande.
In demm Moment, wie d‘ Glastür vor ihrer Nos audomadisch uffg’fahre isch, un sie ei’getrete isch hupft äuner von denne  Weihnachtsmann uf sie zu. Statt sich awwer irgendwie hilfsbereit und höflich zu erweise, hebter de Irmi än Revolver an de Backe un brüllt:
„Händ‘ hoch! Des isch än Üwwerfall! Un wenn sich äuner regt, knalle mir die Omma zu allererscht ab.“

D’Irmi war dodahl verschrogge awwer au sehr verärgert un de kalte metallene Lauf von demm Schießeise hat ihr ja au am Backe wehg’macht . De Egon, was de langjährige Sparkasseang’stellte hinerm Schalter g’wäse isch, hat sich ä bissle verlege g’räuschpert und freundlich g’sagt:
„Meine Herre, wie sie an unsere Eingangstür erkenne könne, klebt do än Uffbebber, wo druff steht, dass unsere Geldb’ständ durch Zeitschloss g’sichert sin. Was bedeute dud, dass wir garned so äufach an unsere Geldb’ständ dra komme könne.“

„Hänn ihr ned s‘ Lese g’lernt, ihr lidderliche Niggolais?“ Hat Irmi middem Colt am Backeknoche g‘schimpft
„Halt du die Gosch, Omma!“
Und zum Bank Angstellte:
„Wenn des Schloß zeitg’sichert isch, dann warde mir halt so lang, bisses ufgeht. Und käuner muckt uf!“
Do druff hadder sein Kumpel g’fragt:
„Hasch de Sack startklar?“
„Hä? Näu! Ich hebb gedenkt, de Geldsack hasch du“.
De Kolleeg hat laut krakeelt:
„Ich häbb doch de Colt und die Geisel! Also muscht du de Sack halde! Von de Logik her scho logisch!“
„Jooo Schneider!“ Hat de Annere erwidert.
„Des hän mir jo garned soo ins Detail b’sproche g’hätt, Klugscheißer!“
„Hasch du dummer Hund jetzat mei Name g’sagt?“
„Klugscheißer?“
„Näu, mein echte Name: Schneider!“
„Jetzat mach dich ned so rum. Schneider gibt’s wie Sand am Meer. Wie soll ma do au no‘ än Kevin Schneider finde?“
Do hat seller Kevin sei’m Kolleg en heftige Fußtritt gegge’s Knie verpasst.
De Getretene hat sofort reagiert und de Schneider ahg’spuckt. Uf sein scheene rote Mantel! Des war zuviel! De ahg’rotzte Weihnachtsmann hat jetzat middem Revolver uf de Kolleg gezielt und g’rufe:
„Des isch dei End“
„Awwer des isch jo gar käu echte Pischtol‘!“ Hat seller betroffe klar g‘stellt.
Ums Rumgugge hat de Schneider die Irmi losg’lasst und isch uf sein Kolleg g’stürmt. Er haddem denne Revolver an de Schädel g’haue un der hat ufgjault wie ä Kettesäg‘. Sie sinn unbändig uffenanner los! Im Schwitzkasschte isch äm Schneider de Bart abg’risse. Jeder hat sehe könne, was de Kevin Schneider für ä Milchbüble isch.
Sie sin üwwernanner her g‘rollt. Erscht de äune Weihnachtsmann uf’m Rücke unnerhalb vom annere, dann Drehung, und jetzat widda uf‘m annere owwedruff. Links rum g’rollt, rechts rum g‘rollt, gequäkt, gschriee, g’schimpft, g’flucht, g‘sabbert und g’stöhnt.
„So ebbes hätts früher ned gegäbbe.“ Hat Irmi g’meint.
„Isch mir au noch ned vor’komme.“ Hat de Egon bestätigt und hat nachg’harkt:
„Was führt dich denn zu mir, Irmi? Was hasch uf’m Herze?“
„Mei Bankcard!“ Hatse erklärt.
„Die häbb ich neilich frisch ‘kriegt. Awwer sie verweigert ihrn Dienscht.“
„Gäbbse mol her, mir stecke se in de Computer.“
Die Zipfelmütze, die Bärt, die Bankräuber, sin weiterhin uf m‘ Debbich rumg’flaggt, wared schwer beschäftigt mit Ringe, Boxe, Kratze und Beiße und laut Ufquääke.
„Do gugg!“ Hat de Egon g’lacht.
„S’hat bloß ä Häkele g’fehlt im Computerformular von deinere Card.“
„ Ach, jetzat bin ich jo erleichtert, Egon!“ Hat d’Irmi sich g’feut. Und in ihre Erleichterung isch dann au s’Üwwerfallkommando durch die Ei’gangstür nei g’stürmt.
Die zwäu Weihnachtsmänner hän des Joahr Weihnachte in himmlischer Ruh…un‘ Neijoahr ganz b’sinnlich… in Untersuchungshaft, begehe dürfe. Ganz ohne Stress und ohne solchene Lichterkette rummenum, wo ma als ganz nervös von werd‘.