Frieher hännt Leit als herzhaft g’lacht. Er war scho in de Schul än Komiker. Er häd fier alles und jeden än kläune Witz nausg’haue. Und so isch’s gekomme, dasser sich sogar ä zwäuts Standbein hat schaffe kenne, in de Fasent, mid de luschtige Rede, un au bei so manche annere Veranstaldunge. Jetzat hockter grod do, und neddemol sei Erdbeer G’schlecks schmeggtem. Er fiehlt sich nimmer ah’g’sagt. Er heert’s Lache nimmer. Ned weil er daaub wär! Näu! Weil d‘ Leit eher stumm g’wordde sin. Hei jo, Krieg, Krankheit un Krise wird denne de ganz Daag um die Ohre g’schlagge. Do vergeht’s Lache. Sei‘ Sohn had scho ah’g’fange, middem künschtliche Ha Ha Ha.  Der had g’sagt, de Vadda däd sich luschtig mache üwwer Benachteiligte, Behinnerte un LGBT. Null zeitg’mäß! Jo, üwwer was lacht Ihr? Hadder de Sohn g’fragt. Un der had zu Antwort ‘gäbbe: des verstehsch Du ned. Soagar än Gägg üwwers Wedder hat kirzlich ä Kollegin im Betrieb als vollkomme uh- ahgebracht kriddisiert: innere dermaße selbschtg‘machte lebensbedrohende Klimakrise! Haddse g’scholte. De Arnold had ah’g’fange so richtig rauhe Witz, mid so ä bissle Waffe SS Vokabular, loszulasse. Had sogar verstohlene Lacher g‘erntet, aber ihm isch’s Lache vergange g’wäse. Ma müsst dagege halde, had de Arnold vertraulich erklärt. Wo er geschtern des Witzle mid derre Blondine verzählt had, isch äune  ‘komme, die ihn regelrecht als Frauehasser z’samme g’schisse had. Näu, hadder vor sich na gebruddeld. Kannsch sage, was d’willsch, s’isch nimmer luschtig. Er had sich g’fiehlt, als hädder de Boode unner de Fies verlore. Dabei hadder sich nedmol ufg’hängt, obwohler scho dra gedenkt hätt. S’isch echt traurig. Hadder g’sagt. Und dann laut g’lacht un g’rufe: Des isch jo än Witz! Und sei Hund, de Goofy, had erwardungsvoll mid sei’m Schwanz g’waggel. Gell, hadder zu sei’m vierbeinige Kumpel g’sagt, Humor isch, wemma trotzdem lacht.