De Ohfang

Jetz werd die afghanistanische Kacke noch e lange Zeit dampfe.
Des isch aa koi Ende mid Schrecke,weil de Schrecke in Afghanistan
erschd mol widder losgehd.
Noch dere Gchichte vun Afghanistan im ledschde Johrhunnerd
war des aa zu erwarde.
Iwwer die Gschichd kenneder mein Beitrag vum April iwwer Afghanistan
nochemol nochlese.
Unser Milidäreisatz hot jo mid dem Attentat in USA ohgfange, in Treue fest.
Wie Krieg gfiehrd werre koh un wie Bsetzung gschehe soll im e Land, des wo faschd  doppeld so groß isch wie die Bundesrepublik, un wo in der zu dreivertel gebirgige Landschafd awwer blos halwer soviel Leit lewe, die sich alle net mege und selwer laufend bekämpfe, des hed mer net blos ahne kenne, sondern mer hed sich a erkundiche kenne.
De Hemmingway hot emol ime Buch beschriewe, wie e Guerilla-Grupp1937 in de Pyrenäe kämpfd hod. Un in de Zeit noch em Attentat in de USA heds aa in 2001 noch ehemaliche deitsche Soldate gewe, die im ledschde Krieg in Jugoslawie de Pardisanekrieg miderlebt hen. Die hede se mol froge kenne, was unser Scheewedderarmee in Aghanischdan erwardet.
De Schröder hod mol zum Irakabendeier vun de Ami Noi gsagd, un sowas wär do sicher aa richdig gwese.
Wahrscheinz kammer bei dene dord vun auße garnix ausrichde, die misse Zeid hawwe, zum sich selwer erschd emol ze vertrage un en Schdaad zu bilde, der wo ind Weld bassd.
Do isches vielleichd aa koin Fehler, wemmer e mol an user aigene Gschichd denkd.
Im Middelalder isch es bei uns mid unserem Fliggedebbich vun Kloischdaaderei aa net viel besser zugange, meglicherweis e bißle dezender, awer im Prinzip wars en ähnlicher Schlamassel. Un der hod ewe aa Zeid brauchd.
Mer koh hegschdens  brobiere, mid werdschafdliche Regelunge zu helfe oder aa zum Beischbiel verhinnere, dass ze die ganz Weld mid Opium versorge.
Awwer do sin ewe die annere aa widder ned oinich, un nochdem die Ami nemme welle, werre sich die Russe un Kinese um den Fall kimmere, bsunners, weils dort hald aa Boddeschätz zum Geldverdiene gebd.
Un des sehd aa net ubedingd noch eme friedliche Ergebnis aus.

Des sen schun triebe Aussichde, do bleibt uns numme:
warde un hoffe.

OA0821