Jetzt, wu i grad em Buddy sei Gschichtl glese hab, bassierd grad soviel in mei’m Kopf…Erinnerunge an dess un jenes, un grad a heit, am Samsdag, am erschde März 2025
In Philppsbursch, wu mer mol gwohnt henn vor net allzu langer Zeit isch a mol so en Nepomuk uff de Saalbachbrick gschdanne (un schdeht heit a noch, awwer a versetzt un isch nimmeh de gleich)
Dort dirft grad d‘ Rothauserschdiermung vun de Narre un d‘ Absetzung vum „Burschemeeschder “ rum sei… War schun lang nimmeh bei so ebbes debai (frieher, als Kind schun) , wu si dodebai voller Inbrunscht sell Philippsburscher Lied gsunge henn und sich deabei ei’ghenkt un gsunge :
Solang da Feiergraawe dursch Philippsbursch noch fließt,
solang am Saalbachrande da Nepomuk uns grießt,
solang Kanonekuchle am Denkmal obenauf ,
solang heert die Gemiedlischkeit in Philippsbursch nit auf !
De „Feiergraawe“ war vum Marktplatz ausgehend ein „gleene Wassergraawe“ zum Lesche, wann’s irgendwu gebrennt hot un isch heit e glaans nochempfunnenes Rinnsal dort ,
D‘ Kanonekuchle uff’m Denkmal solle uff’me Marktplatz-Denkmal uffghaift vun denne sei, mit denne Philippsbursch 1799 bombardiert un em Erdbodde gleich gmacht worre isch…un a viel Leit debai umkumme sin…
Un heit um die gleich Zeit leide in Brusl, wu’mer jetzt wohne, alle Brusler Kercheglogge… weil heit vor 80 Johr , am 1. März 1945 (also gege End vum zweide Weltkrieg) Brusl noch bombardiert worre isch vun US-Bomber : in’eme 45-Minudde-Oagriff sin 900 Sprengbombe und 49 000 Stabbrandbombe uff d’Schdadt runngerschmisse worre un henn die zu 80% in Schutt un Asche glegt. 1000 Leit sin debai umkumme..(.muss noch noochlese, wie’s domols em Brusler Nepomuk an de Brick gange isch…)
Geschdern owend (un heit morge in de Zeidung) die Noochricht vum derzeidiche US-Präsident , wu en annere Präsident, wu zu Verhandlunge bei’em war , nausgschmisse hot un ‚em vorgschmisse , er ded en 3. Weltkrieg provoziere, was der bschdimmt net gwollt hot …
Narre, Brickeheiliche , Bombe un Krieg…sin grad in mei’m Kopf un mein’re Seel‘..
…was fer’en verriggde Dag ‚ !
Beim Nepomuk in Malsch, während de Kriegszeite im Joahr 1941, ischer von Wehrmachtssoldate äufach so umg’schmisse worde. Es wared bei denne awwer zwäu Steinmetz debei. Und die häns widder restauriere müsse, weil ma war scho sauer uf die Leit, die im Theresiehaus unnergebracht wared.
Hab’s jetzt noochlese kenne: de Brusler Nepomuk isch uff de Saalbachbrick in de Kloschderschrooß gschdanne, dessweege isch de südl. Dail vun derre Schdrooß schbäder sogar im Schdadtplan als „Nepomukschdrooß“ gfiehrt worre. Die Gegend isch im 2. Weltkrieg u’versehrt gebliwwe, die Schdadue isch awwer dann zamme mit de Brick 2004 umfassend renoviert worre. Vielleicht hot der Nepomuk domols alles um en rum b’schützt ???