Ich häb in derre Woch frei g’hätt, wegge Ibberstunde Abbau. So häb ich au mol Zeit fier mei Dochter g’hätt. Sie isch die allerjingschte von meine Kinner, die zwai Söhn sin ja scho groß un hän selber Familie. Mei Dochter isch abber nochmol ä spätes G’schenk g’wäse. Un heit fuffzehn Joahr jung. Ihr großes Thema isch de Klimawannel. Un was hasdse mir ned alles verzähld, wie ma d’Atmosfäär zu gase un was mir ned alles ned mache. Un am Freidag wär in de Stadt ä große Verahstaldung von „Fraiday for fjutscher“.
„Was Ihr do bloß welled“! Häbich g’sagt. Un die Kläu:
„Kannsch mich ja no fahre un dir des ahgugge. Dann kapiersch vielleicht meener“?
„Wann soll des sei“? Häb ich g’frogt-
„Am Freidag , odder“? Hatse uhgläubig z’rickgebbe.
Un so sin mir am Freidagmiddag los g’fahre. Ich häb mei alde Cowboy Hut uff g’setzt. So wie frieher, wenn mir Sankt Maddin Umzug g’macht hän. Un ich häb ä T-Shirt middem Johnny Cash ahgezoge. Do isch des Bild druff, wo de Johnny Cash de Middelfinger zaigt. Die Dochter had vom Händy hochgeguggt un de Kopf g’schiddeld. Alla! Sie kennd die Power von ihr’m Vadder ned!
In de Innestadt ahgekomme, ich häb noch s’Audo geparikt, un sie glei los zu ihre Rasselbande. Wie ich dann au do ahkomm, seh ich än Haufe Kinner. Un ä paar hän sich Schilder aus Babbkaddong g’macht g’hädd un Zeigs druff g’schribbe. Ich häb g’lese:
‚Mir sin hier , mir sin laut, weil ihr uns die Zukunft klaut‘
Uff äm annere Plakat had äuns druff g’schribbe:
‚Moodor aus Fahrrad fahrn, Für das Klima Bus un Bahn‘
Dann isch än Kerle uff derre Bühn erschiene un had in ä Mikrofon nei’grufe:
„Gebbt mir än R! Gebbt mir än W! Gebbt mir än E! Was isch des? Scheiße“!
Heilandsack, häb ich mir gedenkt un häb zuguggt, wie sich än Haufe Bolizischte um den Platz sortiere.
Un der Hempel uff demm Podesscht ruft laut:
„Hey Hey! Wer ned hupft, der isch fier Kohle“!
Dann ischer uf derre Bühn nuff un nunner g’hupft. Ä paar wenige von de Kinner hännem des nach g’macht. Un de Rescht, so wie ich? Sin fier Kohle? Äuns muss klar sei: Ich häb ä Leideschaft fiers Grille uff’m Holzkohle Schwenkgrill im Gaarde. Un hier gibt’s ned e mol än Bradwurscht Stand!
Nebbe mir isch dann au än Trupp Bolizischte uffgeträdde. Un ich häb pletzlich den Song von de Rolling Schtones im Schädel g’hädd. Street Fighting Man! Ich häb sogar die Gitarre Riffs in meim Inneohr g’heert. Der Bue uff dem Podium hupft immer noch rum, von de Seit her glotzt mich än Bolizischt ah. Ich häb gedenkt, den kenn ich doch. Dess kann doch ned sei? Des isch doch de Schoki!! Also, de Schoki isch frieher im Schulbus immer am Fenschnter g’hoggt un hat mit äm Strohalme aus äm Drinkkartong, ä Schokoladegetränk getrunke. Mir hänn en immer Schoki g’haiße. Der war mit seim Schoki jede morrge so stur un so dämlich. Ich häb immer an die Scheib vom Bus geklopft, wo er g’hockt isch un er had kai Mien verzogge. Nie! Er had null reagiert in demm Schulbus.…Un jetzat seh ich den do als Bolizischt verkleidet! Mid demm gleiche G’siecht un derre Körperhaldung! Un in meim Kopf heer ich de Street Fighting Man von de Rolling Stones. Un alle sin hier uf Prodescht weggem Klima. Un mich ibberkommt nur noch:
„Denne muss ich des zaige, wie’s geht!“
Ich dreh mich zum Schoki, fuchtel mid meim Middelfinger vor seinere Nas rum un brill dodahl laut: „Klima-Schänder! Klimaschänder“!
Un ich denk: ‚Ha! Schoki! Du bisch ä Lachplatt von Bolizischt g’worde aber ich bin de Street Fighting Mään, de Rebell“! Un scho driggt ebber mei Nas uff d‘Stroß! Sie verdrehe mir die Ärm uff de Rigge. Zwäu Bolizischte heebe mich dann hoch und führet mich in derre Haltung mit de Ärm uff’m Rigge an ihr’n Bolizeibus. Mei Cowboyhut isch uf de Stroß weg’rollt. Ich seh bloss, wie än so än Rotzleffel uffhebt un fortdabbt. Acht Meeder weider erkenn‘ ich än G’schäftsolleeg. Der glotzt un kriegt d’Lapp nimmer zu un had am Mondag was zu verzähle.. Dann erkenn ich mei kläu Dochter schräg vor mir un sie ruft:
„Pabba! Du bisch voll peinlich“!
Un so bin ich dann in de Ausnichterungszell im Bolizeirevier im Keller g’landet. Sie hän mich schmore lasse! De ganze Nachmiddag! Un än Bolizischt, der mich verheert had, wohnt vier Heiser weiter von mir un versucht sich krampfhaft nix ahmerke zu lasse.
Sie hänn mich abfoddografiert un Fingerabdrigg g’nomme, als wenn ich de Staatsterrorischt Nummer Äuns wär. Un dann hän se mich die ganze Nacht widder unne in ihrm Keller weg g’sperrd. Vom Schoki häb ich nix mehr g’sähne. Abber in derre Nacht sin mir alle Sünde vom Lebe ei’gfalle un sie hän mir de Gürdel, s’Händy, mei Uhr un Schuhsenkel abg’nomme. Ich war verlore un schlaflos. Un ob’s de Schoki vielleicht garned war?
Un jetzat, am friehe Samschdag Morjge lasse ze mich widda laaufe. Sie hän g’sagt, seller Ahgriff uff die Bolizei käm zur Ahzaig. Mir duun noch alle Knoche weh. Un Kopfweh ohne Ende! Abba des Schlimmschde, steht mir bevor, wo de Bolizischt uff de Diereffner druggt un seller Brummton kommt un ich raus trett in die Freiheid. Ich seh unser Audo, ich seh mei Fraa. Warum häd se jetzat so ä rodes T- Shirt ah? Un än Uffdruck mid demm Kopf vom Che Guevara? De beriehmde Oberrevoluzzer von Kuba? Des isch ibberhaupt ned ihr Kleidungsstil! Sie grinst von äum Ohr bis zum annere. Ich denk bloß noch in mei’m Elend: Alsemol isch de Humor von meinere Fraa äufach nur saubleed.
26. Oktober 2022
De Babbe un Friday For Future
Buddy Hills
Kommentare
Ha dess derf doch ned wohl sei???
Senn den die von allene gute Goisder verlasse??
Also wenn eh dess leese thu do bleibt ma tschpucke weg.
Awwa wirklich…Un ih kenn eh paar von denne un do werde sagge sennse awer sowas von okay …
Ih hebb me scho immer gefragt wie had des in Sturghad hatt sei kenne dass See 600 Ahenger vom KSC eikesselt henn willst aus Badde komme senn??
Noi..wenne des lese tue??
do gebbt des eh gans anders Bild..
Do fangt was ah zum Himmel zu stinke…Do kann man denne bloß sagge Bitte uffwache befors zspät werd…Denn eh Gschmäggle had sowas scho…loider