Bei derre nun folgende G’schicht fang ich am beschte von vorne ah, indemm ich von hinne durch die kalde Kich komm. Es isch ned selde, dass die Fraa im Haus so guud wie immer kocht un de Mann als „Maischterkoch“ eher so ä Eventkoche macht. Alle saage dann: „Ou, der hats abber druff“. Es kann aber au vorkomme, dass än Mann speziell fier sei Fraa ebbes kocht, wie neilich, ich, als die mainige fier ä paar Daag bei ihre Schweschter in Benshäum g’hoggt isch. Un wie se am Sonndag um Sechse Oweds z’rick hat sei welle, häbb ich ihr versproche, ich däd se bekoche. Mir hod sich dann bloß noch die Frog g‘stelld: Badische Kiche, französische Küsiiiiiien odder waas? Entschiede häb ich mich fier ebbes äufaches: fier Rindsruladde. Alla, ned lang rumg’faggelt. Ich häb vier Ruladde erstanne. Zwiwwele un Gürkle g’schnidde, Schwarzwälder Schinke zurechtg’legt, die dinne Flaischlabbe mit Senf ei’gschmiert, Salz und Pfeffer druff. Un jetzat alles z’sammeg’rollt. Abber mit waas feschtheebe? Do isch mir’s glei ei’gfalle: mid em Fadde. Alla, häb mich ans Nähkäschtle von meinere Fraa g’macht un geguggt, was ich fier Fadde find. Ich häb ä paar Rolle in’d Hand g’nomme un gedenkt. Die had viel Faarbe. Ich mach jedere Ruladd ä anner Farb. Des find’se b’stimmt luschtig. Un so häbb ich die Ruladde verschniert wie ä Poschtpäckle. Ma glaubt garned wieviel Fadde mer braucht fier so Ruladde! Immerhin solled se ja au z’sammehalde. Nach getaner Erwed, alles widder ins Nähkäschltle z’rick. Ich häb erscht jetztat g’sähne, dass ich des alles mid de Senf- un Ruladdefinger in de Händ g’hät häb. Des vergeht widder, häb ich mir vorg’stelld, weil ich seh se nur so was von selde am Nähe. Näkschter Schritt: Ich häb Olive-eel nei’schidd, weils Soneblumeeel so deier isch, wegge Urkraine. Un des Olive-eel isch b’sonnersch werdvoll. Mir hänns von Idalie mitbroch g’häd, wo mir am Gardasee wared. Äuns isch au klar: Rind immer hart ahbraade! Un dasses ned ah hängt, bloß ned am Fedd spare. Es isch jo fier mei Schatz! So häbb ich g’waarded bisess Fett sprudelt un dann die Dinger nei falle g‘lasst. Dess war Powerplay un nix fier Zartbeseidede! Ma kennt jo noch die Dunschtabzugshaub eischalte? Joo, mei Mudda hat au kaine g’hädd un s had immer g’schmeggt. Pletzlich leest de Rauchmelder Alarm aus! Heeah, sin die Dinger laud! S’beschte isch, ich bau die Badderie aus, dann isch Ruh. Ich fin nämlich kai Abschaldvorrichtung. Es brennd jo ned! Abba dann wurd mirs mulmig un ich bin widder zu meine Ruladde g’hechtet. Schnell die Pfann weggezooge. Ned dasse mir ahbrenne! Isch des jetzat än Kratzer uff m Glaskochfeld odder bloß ä bissle ä G’schmiers? Ich maäun, so ä Glaskochfeld isch dafier g’macht, dasses ebbes aushäld. Späder hald gut poliere! Dann vergehts widder. Alla, guud. Jetzat wars doch leicht kräftig ahgebraade. Beim Grille im Sommer wirds als au mal ä bissle schwarz und‘s steert käuner. So ä Rulladefläusch isch ja bruudal dinn. Also wärre se scho fascht ferdig sei, häbb ich mir ibberlegt. Un dann bin ich hergange un häb Krokettle in de Backoofe neiglegt, uffs Blech. Un dess vorher gut äug’fedded, dass nix bebbe bleibt. Nach dem Moddo, „Klapp zu – un Aff dood“, glei uf volle Pulle Temperatur ei’gstellt, dasse kross wärred un ned so labbelig. Und nun! Meine Dame un Herre! Hier kommt de Schtar vom Owed! Rotkraut.! Ich häb ä Dos g’holt. Die sin ja au in Ordnung. Des geht ja au schnell un sauber, heidzudaag, Was sich mei Mudder immer rum ploogt häd mid denne Kohlkepf aus’m Gaarde. Jetzat, Dos in’d Mikrowell un „Power on“. Wie ich so guud in de Zeit war, häbb ich ä Bierle uffg’macht. Ich setz hochzufriede de Flasche Effner ah …do gibt pleetzlich än Riesegroße Knall. Ä Bomb!!! Hä? Bei uns dahäum? Die Diier von de Mikrowell isch weg g’flooge, ibberall Roodkraud, Stinke un Qualme. De Kiehlschrank had än Mords Delle ab’kriegt. Der isch do falsch plaziert in derre Kich. Die Mikrowell isch hie. Isch die zu bleed, ä Dos Rotkraut uffzuwärme? Billigzaigs von Kina. Ahhh… Mei Fraa had als immer ä Glasschissel! Käu g’schlossene Sache oder Metall in d‘ Mikrowell. Jetzat häb ich äu äunzigsmal ned Obacht g’hädd. Ich nemm än Schreckschlugg aus de Bierflasch un de näkschde Schreck kommt direkt hinnerher. Ich heer nämlich, wie’d Wohnungsdier uffg’schlosse wird. Es isch grademol viertel Sechse! Die Schtimm von meinere Fraa heer ich, un sie ruft: „ Hallo! Schahaz! Bin bissle frieher do“! Un dann: To-tenn-stille! Aus’m Backoofe kommt Qualm naus. Mei Krokettle! Die Verräder! Was had mei Schatz sellemals g’sagt, wo mir g’heirad hän? „Ich lieb dich ned, fier was du masch, sonder fier wer du bisch“.