‘D Alegsa un iich – E Korzschdorrie iwwa zeidgenessische Undahaldungseleggdroonig

Ledschd waa em Amadzoon Schlussvakaaf… Alla, hewwe dengd, guggsch e mool, was so ogeboode werrd. En Haufe Zeig – nadiierlich alles reduziierd! For allem die Gereede wu vun Amadzoon selwa kumme. Do binne uff soo e Ding gschdooße, des schimpfd sich Echo Schou. Wie die meischde Gereede heidzudaag hadd aa des Ding en Tadsch-Sgrien! Awwer haubdsechlich ischs gedachd, um per aigena Schbrooch gschdeijad zu werre. Denn Schbaaß gebschda mool hewwe dengd! Zwee Gligg un des Gereed waa bschdelld, un, weil ma heija joo e Braim-Kondo had, hads da Poschdla aa brommd em neggschda Daag vorbeibrochd. Gschbonnd waare jo, awwer ned foller Foorfraid, so als wannd e neis Audoo abhoole geesch. Also Kadoon uff, des Gereed en Schdroom ogschlosse un abgwaad was jetzat so bassierd! Beim Eirichde will die Fraa, die aus dem Ding midda zum Babble ofangd, dei Schdimm kennelerne. Sie deed oim 4 Sedz vorbabble un ma solld des donn nochschwedza. Freilich musch de doo als Badener e bissel zammareiße, weil des Nochgebabbel solld joo einichamaaße uff hochdeitsch bei dem Gereed okumme. Da ma als Badener awwer joo sauwer fleggsibel isch un en seim bisheeriche Leewe a midgriegd had, dass ned alle Schbroche so oifach un bragmaadisch senn wies Badische, geehn die 4 Sedz ohne weidere Brobleeme iwwa ‘d Libbe.
So jetzat kennd des Maidl dei Schdimm un weiß kinnfdich weerd bisch. Es isch aa ziiemlich indressond, was ‘d Alegsa (so nennd se sich) alles uff blumbe Zuruuf so konn. Wiedjos abschbiele, Lieda foorschlaage, ’s Wedda foorheersage, oim bei Zeid uffwegge, odda ma konn ihre da neggschd Eikaafszeddl diggdiere. For alles dess longd die kinschdliche Indelligens, awwer weeje du willschere was beibringe, wu se nonned kennd! Do werrd se ziggich odda reagiierd gaaned. Denn Fasuuch, se uff Badisch abzurichde hewwe schnell uffgewwe, weil do had sich mool widda gezeigd: Badisch werrsch geboore! So gschwind e mool lerrne gehd do ned! Awwer so hewwe em briwaade Bereich immahin die Meeglichkaid e bissel hochdeitsch zu babble un kombliziierd zu sei. So bleibd de Hernkaschde aa in Beweegung!

© Benny – de symbadische Kraichgauner