S’war Neischnee g’falle un s’häd sich än kalde Newwel drüwwer g’setzt. Dämmerung häd alles in ä düüschtres Licht gedunkt. Ihr Händ‘ hän g’frore, un sie häd  versucht, die Fingerlen mit ihr’m heiße Atem uffzuwärme. Ihr Näsle war scho ganz rood. Sie hod garned viel Kleidung a’ghätt. Neddemol än Mandel odder ä Jack odder ebbes. Käu Kapp, käun Schal, bloß ä dünns Hemmel. Heilig Owed un ä Mädle ganz alläu un verlasse uf de Stroß drauße. Mid ihre dünne Schläbblen isch se im Schnee g’stanne. Weiße Woinachte, aber so? In de Kälde? Von aller Welt vergesse? Ausg’stoße? In de Vorgäärde von derre Gegend hän bunde Lichtlen geblinkt, und Kunschtschneemänner hän Kunschschlidde mit Sternlen gezooge. Än Haufe Fenschter wared hell erleuchtet, käu Vorhäng zu gezooge odder Rolläde nunnag’lasse, fier, dass d’Leit sähne kenne, wasse fier schee Chrischtbäumlen in de Stubb stehe hän. S’Mädle hod neigeguggt, awwer s’wurd ihr ned warm. Un au ned warm ums Herz, wie’s am Heilige Owed häd sei solle. Käuner, un niemand, hod’se bemerkt odder in irgendäuner Form nur wahrg’nomme. Jetzat hod se sich äufach au nahogge müsse, weil ihr Fieß hän weg gedue. Die hän äufach zuviel zu ertrage g’hädd. De Himmel war zugezogge. Voller Schneewolke. Die hän widder ahg’fange leise zu riesle. Schnee kann ganz schee erbarmungslos sei! Von irgendwo hod’se ä Woinachtslied g’hört. Verzweiflung isch in ihr hochg’stigge. Soll soo ihr junges Lääwe ende? Verfrore und äusam in de Nacht? Käu Liebe? Käu Familie? Nix zum Esse? Sie hod jo neddemol Geld g’hädd. So ä aarms Mädle! Un des heitzudaag! Kinnerarmut! Genau! Do wird viel von g’schwätzt, awwer wen intressierts? Hod se sich gedenkt. Un in demm Augeblick isch de Engel erschiene. Des war än große Engel. In all säunere Pracht hodder se ahg’strahlt.  Un er hod in äm sanfte Ton g’sproche: „Mädle! Du bisch jo scho halwer verfrore!“ Sie hod käu Wort raus’kriegt awwer mid große ‚Auge g’staunt. „Hosch gar käu Familie mehr? Käun gedeggde Disch? Un käu Bettle?“ Seller himmlische Engel  hod’se scho richtig geblended, so äh Strahle Wese war der.. „Ja, doch,“ konnt’se endlich tonlos antworde. „ Awwer die sin so gemein zu mir. Ich bin wie’s  Aschepuddel. Ä dodahl schlimme Stimmung. Do werrsch bloß ahgebrülld.“ De Engel hod sich zu ihr gebeugt un leise g’sagt: „ An Woinachte erwaard‘ ma als zuu viel. Du bisch doch eher cool un schtabiel. Jetzat geh widder nei und trink ä heiße Schoggolad, sonscht bisch de Rescht von deine Ferije noch verkält.“ „S’isch mir doch egal“, hod se sage welle, awwer hods dann doch, äm Friede wege, sei g’lasst,  un‘ isch widder nei. De Engel isch weggedabbt, hod sei Daschelamp ausg’macht un hod zu sei’m alde Hund g’sagt, wo geduldig midgedroddel isch: „Bubbadääd un Woinachde! Do hosch dei B’scherung!“ Un’d Moral von derre G’schicht isch: Jeder braucht als irgendwo än Engel, egal, wer des grad isch.