Neuerdings, do gebt’s e Mittel,

me kriegt’s in jeder Apothek.

Die Forscher in de weiße Kittel

henn was ganz B’sonners bracht zuweg.

Bonostad, so heißt des Ding,

was in aller Munde isch.

Des soll Wunder wirke, drin

steckt was anners als Du bisch.

’s isch ganz ähnlich wie e Droge,

uff Dauer ännert’s unser Hern

zum Gude hie, des isch net g’loge:

Vernünftig, friedlich soll ma werr’n.

Me möcht gern die ganz Welt umarme,

voll Liebe un verständnisvoll,

me kriegt un hat aa meh Erbarme

mit all’ne Wese – eidrucksvoll!

Werd blötzlich schlau un duht erkenne,

wie ma d‘ Natur erhalte könnt,

duht net bloß hinner’m Geld her renne,

e Machtbedürfnis isch ei’m fremd.

Die Frog isch, wie preist ma die Tropfe

b’stimmte Politiker do aa?

Vielleicht ins Bier so mit em Hopfe

oder an d‘ Salatsoß draa?

Un wenn se’s freiwillig net nemme?

Vergiftet werre die jo net –

dann lernt ma halt was Anners kenne,

do gebt’s ganz b’stimmt was, jede Wett!

Die Psychologe jedefalls

verwende des seit diesjahr scho

im Ländle un aa in de Pfalz,

bei uns sin halt d‘ Erfinder do.

Un wer die Tropfe heimlich still

im kloine Kämmerle probiere

un beese Leit uffdränge will,

der hat jetz Pech – April, April!