Else Gorenflo, Autor bei Badische Gutsele

Uff de Stuteseeer Wiesse

Else Gorenflo — Tue, 26 Oct 2021 18:36:51 +0000

Uff de Stuteseeer Wiesse

Uff de Stuteseeer Wiesse

hemmer früher Grasbolle gschmisse

Bei de Heuet simmer unnerm Nussbaam gsesse

in seim Schatte hemmer unser Brotkneisle gesse

Wasser gschöpft em Brunne beim Schloß

un haamzus gfahre mit Wage un Roß

Spootjohrs sin die selwergmachte Drache gfloge

hen mit de Schwalbe die Bahne gezoge

Mir sin üwer d’Gräbe ghopft die gwässert vun Hand

So wachst dann dess Fuder uff dem karge Sand

Die moischte Zeit hen mir schaffe misse

die Ferie verbrocht uff de Stuteseeer Wiesse

Zwoimol hemmer dort de Heuwage umgschmisse

die Küh sin durch e Deichsel war grisse

Wenne heit die Stell mitem Auto passier

dann schalte runner obwohl e pressier

I such de Nußbaam sein klägliche Rescht

knorrig alt grüßter rüwer Ja o ischs gwest

un bevore dann meiner Wege geh

Sage immer des war e Stück von meim Stutesee

Der Beitrag Uff de Stuteseeer Wiesse erschien zuerst auf Badische Gutsele.

Mei Elternhaus

Else Gorenflo — Tue, 11 May 2021 12:22:59 +0000

Fescht wie ein Fels im Sturmgebraus
steht dort em Platz mei Elternhaus.
Mit seine 107 Johr
kommt mer’s noch ganz passabel vor.
Die Maure zentimeterdick.
en Luftschutzkeller, einscht e Glück
war’s Schutz un Schirm zu alle Zeite
was Kind un Kinneskinner leide,
was se so familiär erstrebt,
Geburt un Tod darin erlebt.
Mächtig denewe Schopf un Scheier
gibt’s jetzt en Wechsel im Gemäuer.
Dort wu die Ahne noch in Fron
geplogt sich hen nach Tradition
baue die Junge ihre Haus.
Koin Fremder guckt zum Fenschter raus!
For unser Sippe so erhalte,
en großer Troscht für uns zwoi Alde!

Der Beitrag Mei Elternhaus erschien zuerst auf Badische Gutsele.

E Apfelbeemle

Else Gorenflo — Wed, 05 May 2021 08:32:54 +0000

I häb e Apfelbeemle gsetzt
dort hinnedraus im Garde.
De Luther hod scho devo gschwätzt,
i derf net länger warde.
Sei Früchte einscht en Annrer pflückt,
en annrer werd se esse.
Doch wenn sei Wachstum wirklich glückt,
werd mer mich ned vergesse!
Häb ich doch a zu meiner Zeit
die Äpfel all genosse,
wu meine Ahne seinerzeit
gepflegt hen un gegosse!
So gucke jetzt im Friede zu
wie ‘s Beemle wachst un blüht.
Un mache dann die Auge zu?
I häb me a bemüht!

Else Gorenflo 17. April 2021

Der Beitrag E Apfelbeemle erschien zuerst auf Badische Gutsele.

Quetschebaam

Else Gorenflo — Mon, 26 Apr 2021 17:00:00 +0000

Mei Quetschebaam dort hinnerm Haus
blüht wie en weißer Blumestrauß.
Die Biene rundum sin entzückt,
sie sammle Honig wie verrückt.
Die heile Welt mit Summ un Brumm
macht all mei Sorge still un stumm.
Es regert erschte weiße Blüte
vom Himmel runner Schöpfers Güte
Sie falle sacht uffs grüne Gras
drin uffem Frühlingstisch e Glas,
als Dipfele un Hochgenuss
des fruchtig frische Quetschemus!

Else Gorenflo 8. April 2021

Der Beitrag Quetschebaam erschien zuerst auf Badische Gutsele.

Mei alter Baam

Else Gorenflo — Tue, 16 Feb 2021 19:25:20 +0000

Mei alter Baam hat viel erlebt
un alle Zeite üwerstanne
Zwoi Krieg, die Erde hat gebebt,
Er steht! Un ziegt me voll in Banne.
Sei rauhe Rinde weist noch Spure,
die Narbe zeige tiefe Riss,
Pastorebiere ganze Fuhre
hen mir genosse mit oim Biss.
Heit bin e widder bei em gwest,
häb uffgeguckt zu ihm voll Stolz,
häb ihn umarmt ganz stark un fescht,
mei Backe glehnt ens alte Holz,
häb mit em gschwätzt,
häb viel verzählt,
häb von ihm glernt was auszuhalte,
häb a mei Sorge net verhehlt
in dere Welt, in dere kalte.
Des mache öfter, bin so weit,
i drück en fescht mit lange Arme,
er dut sich zu Coronazeit
mit Hautkontakt meiner erbarme!
Un die Beziehung isch konstant,
die werre mir a weiter pflege,
Mei Bierebaam er hod Bestand
un isch bis heitzudag en Sege!

Else Gorenflo 10.02.2021

Der Beitrag Mei alter Baam erschien zuerst auf Badische Gutsele.

Durchhalte

Else Gorenflo — Sat, 13 Feb 2021 19:28:17 +0000

Em Tunnelende scheint e Licht
En Hoffnungsschimmer! Werd’s bald heller?
Mir fahre immer noch „uff Sicht“
Un öfter isch des Virus schneller.
Mir sin gebremst, mir sin maskiert,
mir derfe bloß von weitem winke
un jeder wu zu viel riskiert,
sieht glei die rote Ampel blinke!
Was bleibt denn? Außer viel Verzicht?
E neues Johr, e neues Glück?
Dass voller Macht des kloine Licht
uns unser Lewe bringt zurück?
Durchhalte, ’s Fenschter ganz weit uff!
Die frische Luft in volle Züge
eigschnauft, en Blick zum Himmel nuff,
wu schwarze Wolke weiterziege.
Des Morgerot am Firmament
e Zeiche! Neue Zuversicht!
Un plötzlich scheint em Tunnelend
die Hoffnung durch, ’s werd widder Licht!

Else Gorenflo 10.02.21

Der Beitrag Durchhalte erschien zuerst auf Badische Gutsele.

Jeder Dag e bissel kerzer

Else Gorenflo — Sat, 14 Nov 2020 19:00:48 +0000

Jeder Dag e bissel kerzer,
jede Nacht e bissel schwärzer,
Morgenebel üwerm Tal,
Blätter raschle Schritt for Schritt,
d’Vögel nemme d’Lieder mit,
sammle ihre Zahl

Wälder färbe sich jetzt bunt,
Traube platze, blau un rund,
rote Äpfel lache.
Goldner Herbst em Üwerschwang
schüttelt wild, wie unner Zwang,
mit em Wind die Drache.

Abschied liegt scho in de Luft.
Feuchtes Laub sinkt in die Gruft,
fordert lebenslänglich.
Uff em Zaun e Amsel ruft.
Letzter zarter Roseduft,
kostbar unvergänglich!

Aus dem Buch „Winterfrucht“ von Else Gorenflo

Der Beitrag Jeder Dag e bissel kerzer erschien zuerst auf Badische Gutsele.

Keschte (Kastanien)

Else Gorenflo — Mon, 09 Nov 2020 19:03:21 +0000

E paar Keschte uffglese
wie früher als Kind.
De Löwezahn ausgeblose
em Oktoberwind.
Die Roseknospe em Zaun
abgebroche
un intensiv e letztes Mol groche

En Drache owe em Himmel schwebt.
Des Spootjohr mit alle Sinne erlebt.
Genieße, um jeden Dag wärs jetzt schad.
De Winder kommt sicher. Er kennt koi Gnad.

Aus dem Buch „Winterfrucht“ von Else Gorenflo

Der Beitrag Keschte (Kastanien) erschien zuerst auf Badische Gutsele.

Warum noochheule (nachweinen)

Else Gorenflo — Sat, 10 Oct 2020 06:31:02 +0000

Warum noochheule (nachweinen)

Die alde Base hods scho gsagt,
wenn de Liebeskummer nagt:
„Mädle heul dem Kerl ned nooch.
Der isch des gar ned wert!
Trauer ned! Hebs Köpfle hoch,
bettle wär verkehrt.
Mädle heul ned hinnerdeer
Guck de liewer um.
Dort steht vor de Hinnerdeer
scho de Nächste rum!
Mädle heul dem Kerl net noooch,
macht die Lieb a blind.
Die annder Mudder, sagt mer doch
hod a e scheenes Kind!

Aus dem Buch: Buwe heule ned von Else Gorenflo

Der Beitrag Warum noochheule (nachweinen) erschien zuerst auf Badische Gutsele.

De Adams-Apfel

Else Gorenflo — Wed, 23 Sep 2020 06:40:11 +0000

De Adams-Apfel

De Adam, der war kaum erschaffe,
grad mit de Eva frisch liiert.
Do muss die noch de Äpfel gaffe,
so isch des Uglück dann passiert.
Die Glischde, so e Frucht zu nasche,
sin größer noch wie de Verstand.
Sie beißt do nei, füllt sich die Dasche,
de Adam fresst’re aus de Hand.
Ab dort hen d’Mensche schaffe miesse,
mer treibt se aus dem Garde naus.
Sie solle ewig defor büße,
die Gschicht geht wahrlich net gut aus:
De Adam schafft, entwickelt Power,
es muss jos Paradies net sei,
er isch bis heit koi bissel schlauer,
sieht er en Apfel, beißter nei!

Aus dem Buch: “Buwe heule ned” von Else Gorenflo

Der Beitrag De Adams-Apfel erschien zuerst auf Badische Gutsele.