PFINGSCHDE

Schbure losse inenonner

Geischt-mäßiche

uff vielerlei Arde

dief bis ins Herz

Begegnungsdonkbar

nemm i Farbteen uff

in mei Leewensmosaik

wu farwicher un dichter  wärd

Form me wie sunscht nimmand weider

durch dess, was i erleeb

treff uff de Geischt in mei’m Gegeniwwer

in viel  Farwe un Forme

Begegnungsfetze

danze in mein’re Seel‘ rum

sie trage un  schdärge me gut

manchmol in Regebogefarwe…

…wann’s numme (immer) so wär…

(nach einem hochdeutschen Gedichtstext von Maria Sassin )

Der Beitrag Pfingschde erschien zuerst auf Badische Gutsele.

Text:

Isch bin en eschde Philppsburscher Bu ,

da schdärgschd in unsre Klass’…

Un wer die Philppsburscher Buwe kennt ,

dess isch e edli Rass‘ :

kee Schlipfl un kee Kräschele,

dess isch uns viel zu dumm ,

mir fahre jo da ganze Daach

im Schdrooßegräwl rum !

Refrain:

Horsch do mol hie, Halli-Hallo , dess glingt ganz Philppsburscherisch,

Philppsburscher misst ma sei !

Voller Witz un voller Schneid

so babble do die Leit ‚

vor so’re Ausdrucksweis hot jedermann Reschbekt ,

dess isch un bleibt da u’verfälschde Philppsburscher Dialekt !

Awwer glaabt mer’s :

So  Philppsburscher Buwe, die gebts heit  garnimmeh

un genauso wennisch den u’verfälschde Philppsburscher Dialekt !

Der Beitrag e alds Philippsburscher (Faasenachts- ?) Lied erschien zuerst auf Badische Gutsele.

Dess hot alles gseh wärre kenne vun de Leit  in de scheenschde Feschddagsglaijder, de Kinnerschieler  un de Kinndergaadeschweschdere , de Weiße-Sunndagskinner in ehre Gwänder, de Mädlen mit de Kränzlen uff un de Buuwe,“gschnigglt un gebigglt“ un mit der Kerz in de Hand…genauso wie vun de Volksschieler un ihre Lehrer, de Jungmänner un Jungfraue, de Rosekranz-Bruderschaft, em Kerchechor,  de Feierwehr, de Schdadtkapell‘ un em Mussichveroij und alle annere, wu mitgloffe sin…

Schun vun weidem hosch sie heere kenne, wann sie gschbielt un gsunge henn…Lieder wie „Kommet, lobet ohne End, dem hochheil’gen Sakrament…“, „Großer Gott, wir loben dich…“, „Tantum ergo sacramentum…“ , „Deinem Heiland, Deinem Lehrer…“  „Lobe den Herren, den mächtigstem König der Ehren …“  usw.

De Abschluss war dann immer in de Kerch drin mit de Mess. Drauß sin dann schun widder -oft a wegem Wedder- glei vun fleißiche un gschiggde Händ die Aldär‘ abgebaut worre un manche Midder sin do schun grennt, um sich noch e paar Zweiglen zu ergaddere fa dehoam. Die ware jo gweiht un sin dann drinn schräg unner’s Kraiz an de Wand gschdeggt worre un sollde fer alles oder gege alles gut gwest sei …

Irgendwann hot’s so e Art vun Fronleichnamsprozessione nimmeh gewwe. Ma isch nimmeh so weit durch d’Schdrooße gloffe  un hot viel Schdazione gmacht, oimol sogar bloß bis zum Schbortblatz un zurick in d’Kerch..Am Schbortblatz hot e Kerchebänd gschbielt un dann sin modernere Lieder gsunge worre wie „Danke für diesen guten Morgen, Danke für jeden neuen Tag …“ un annere aus „Dschässmesse“ wu ma gekennd hot domols.

Schbeeder hot’s dann ghaiße vun de Junge: „Fron“…. dess isch e Scheiß-Sach gwest frieher fa d’Leit un en „Leichnam“ isch a net grad ebbes zum Feiere…also, was solls ?“

Un noch e bissl schbeeder henn sich d’Umwelt-Schitzer driwwer uffgreegt, dass fa die paar Schdund vun derre Prozession  soviel Bisch un en Haufe Pflanze aus Gärde un vun de Äcker henn g’opfert  wärre un droa glaawe misse, wu net hedd sei misse…

Was macht ma dann ?  Grad heit morge haww i mitgriegt, dass ledschd unner de Kerchgänger am End vun de Mess Pizza-Schachdle verdailt worre sin , die sie mit Erd fille keende un Pflänzlen in’eme Muschder neisetze kennde zum schbeedere Wiederverwende. Die sollde se zum Blatz vor de Kerch bringe un kennde sie dann nooch denne Zeremonije wieder abhole…Also nix do meh mit riesiche Kardons voller Blumebliedeblädder : rode Klatschmohn, blaue Kornblumekepflen, rosa Roseblädder un weiß-geele Margreedlen  usw. ?  Noochhaldichkeit isch gfroogt…

I froog me bloß: was hallt vun allem annere vun Fronleichnam  heit bei de Leit noch nooch… was isch fa’s „Innedrin“ do noch verwertbar ?

Der Beitrag Wisst’er noch ? Vun de Fronleichnamsprozession … erschien zuerst auf Badische Gutsele.

E Schdigg Himmel

An Chrischdi Himmelfahrt

de aig’ne Himmelfahrt (noch) drotze

un sechseachtzichjährich

mi’m alde NSU-Drohtesel

wu ma mol vor vor fuchzich Johr

beim Preisangle gwunne ghat hot

u’beschwert un leichtfießich

in de Vadderdag neidrebble

Uff’m Fischerfescht drunne

sich unner d‘ Leit setzte

mit’nanner Schbrich glopfe

en Halwe schbendiert griege

un zum Middagesse uff de nägschd eilade.

Sich iwwer’s  Ur-Enggele fraije

wu oam schun vun weidem zuwinkt

demm e Eis kaafe

un zum Noochdisch noch sich selwer

en Kaffee gunne

un e groß Schdigg  Schwarzwälder dezu.

Mit so’me gfillde Bauch jetzt noch de Ei’fall wohrmache

all denne drumrum ganz in de Neh‘

e gloans Weltwunner  zu bräsendiere

un’enne de dickscht Boamschdommin de ganze Umgewung

zu zeige

Mit ausgschdreggde Ärm  wärd dort Maß gnumme

iwwer finf Meder Umfang bewunnert un beschdaunt

a wa’ma  dodebai bei sich so langsam – oh je, oh je-

’s iwwergangene Middagsdief schbiert…

Sich ein gloane Moment lang bang frooge

ob’s noch mi’m Rad fa hoamwärts langt (?)

Awwer  ma fährt jo dessmol net elloij…

Dann in de Grupp‘

in’erre Kurv‘ grad oimol

de Abschdand net richdich eischätze

’s Hinnerrad vun de junge Vorderfraa schdreffe

un selwer mitsamt derre

vum Saddl falle

Zum Glick

ins hoche Gras

Wie uff Kommando

sich oagugge und laut lache kenne

donn awwer gschwind sich uffrabble

’nanner beischdeh beim Uffschdeh‘

un horddich uffschdeige un weiderdrebble

wii wann nix gwest wär…

Jetz awwer numme ziegich hoamzuus‘

mi’m Wind vun hinne

e’me ganz deewiche Kopf

-Jesses Gott-

un de Daddschkapp em Gnick…

In de aig’ne vier Wänd‘ dann

glei alles mit Schnaps ei’reiwe

wu weh dud

un hundsmied un dodevu ei’gnäwwld

uff d‘ Couch singge

Vun jetzt uff noochher

in de Diefschloof kumme

mi’me Schmunzle im Gsicht

den Ausflug preise

un beim devu Droame

sich heelinge nochemol

e Schdigg Himmel ergaddere…

Der Beitrag E Schdigg Himmel erschien zuerst auf Badische Gutsele.

Wie bisch do als Fraa druff an so’me Dag , wann dess waisch ?  ’s war koani im Kranggehaus un wie immer dehoam…

Wie war de Monn un Vadder druff, wu domols nonet debai war em Schloofzimmer odder in de Schdubb newwer de Kautsch un sei Fraa , d’jung‘ un bal dreifach Mudder net unnerschditzt hot obwohl er dess vum Doggder a gwißt hot ? Drauß isch er glegge em Owwerdenn in de Scheier em Schdroh  un hot gheilt wie en Schloßhund. Wie wärd’s em bloß zumut gwest sei, wie ma noch’m grufe un’en gsucht hot un gschraue: „Kumm rei, Seppl, ’s Kind isch do !“ ? Un wie froh wärd’er gwest sei, dass, wie’er neikumme isch, all beinonner ware un nimmond dod ?

’s Kind, e gsunds Mädl nooch seine zwai Buuwe, wu schbäder , sich zwische denne un bsunners newwer’em jingere Wilde behaubde gmisst hot un selwer a e Wildi worre isch, wu Energie ghat hot fa drei .

Un d’Mudder (grad mol 24 Johr alt) , die hot viel Kraft verlore bei un nooch derre Geburt, hot e paar gude Schutzengel gebraucht, um die zu iwwerleewe  un wissende Händ um se rum.un bei sich. Dennooch erscht isch si krank worre, isch immer leicht oafällich gwest , hot’s em Herz ghat un noch viel annere Granggedde griegt , hot nimmeh mit uff d ‚ Äcker kenne zum Schaffe un hot viel em Bett ligge misse.

Un ’s gloij Mädl ? Isch immer wilder worre, isch grennt un ghopft un rumgedoobt   un hot alles ehre große Brieder nochgmacht. Wi’s so an die zwai, drei Johr alt gwest isch, war d’Mudder mol widder krank im Bett glegge mit Glenk-Rheima  un hedd Schloof un Ruh gebraucht, dass si d‘ Schmerze nimmeh so schbiert. Awwer was henn d’Äldere gmacht ? Henn oifach den gloine Wildfang zu’re ens Bett gsetzt un sin fortgange ens Feld zum Schaffe. Dass dess wilde gloane Kind  net schee brav bei de Mudder sitze oder ligge gebliwwe isch un oagfange hot uff demm große Bett rumzuhopfe wie uff’emme Trampolin , war abzuseh un bei jedem Hopfer vun’m  hot d’Mudder Schrei vun sich gewwe vor Schmerze un dess Kind oft oagfleht , doch uffzuheere mit de Hopferei, ’s ded de Momme doch so arg weh duh…

Awwer hot’s dess gmacht ?  Nadierlich net ! Un je meh d’Mudder gjoomert hot, umso meh hot’s mit seine Batschhändlin derre entwedder ins Gsicht gschlarre odder ehre Libbe zommegedrickt und  debai gruufe : „Bisch net luich , bisch net luich (ruich ) !?  Un wie d’Momme schließlich gheilt hot vor lauder Elend , hot’s noch greeßere Hopfer gmacht un browiert, bis nuff ens Kraiz zu kumme, wu de Herrgott ghangge isch  (wie domols fascht in jedem Schloofzimmer iwwerm Bett )  un hot demm dann gedroht…isch mol ganz korz mi’m Fingerle iwwer die Schdell gfahre, wu d‘ Fieß mi’m Naggl durchbohrt ware  un debai gruufe: „Liewer Herrgott, wonn mei Momme net gsund mechsch, donn schlag i ‚der dodriwwer d‘ Fieß ab ! “ Un wen wunnert’s net, dass genau dort dann an derre Schdell en Schbrung zu seh war ???

„Wenn ein Kind so unserem Herrgott droht, dann müssen sie ja wieder gesund werden !“, hot dennooch d’Gronggeschweschder zu de Mudder  gmoant, wu kumme war, um noch’ere zu gugge.

d‘ Mudder domols, dess war mei Oma  un der gloij Wildfong  mei Mudder…un heit sin’s genau 98 Johr her seit derre schwere Geburt. Muss widder an alle zwai dengge un an dess, was’mer  so vazehlt worre isch vor viele Johr vun de Oma…wärr’s nie vergesse !

Der Beitrag Vun’eme Gebordsdag, wu bal 100 Johr her isch… erschien zuerst auf Badische Gutsele.

In Philppsbursch, wu mer mol gwohnt henn vor net allzu langer Zeit isch a mol so en Nepomuk uff de Saalbachbrick gschdanne (un schdeht heit a noch, awwer a versetzt  un isch nimmeh de gleich)

Dort dirft grad d‘ Rothauserschdiermung vun de Narre un d‘ Absetzung vum „Burschemeeschder “ rum sei… War schun lang nimmeh bei so ebbes debai (frieher, als Kind schun) , wu si dodebai voller Inbrunscht sell Philippsburscher Lied gsunge henn und sich deabei ei’ghenkt un gsunge :

Solang da Feiergraawe dursch Philippsbursch noch fließt,

solang am Saalbachrande da Nepomuk uns grießt,

solang Kanonekuchle am Denkmal obenauf ,

solang heert die Gemiedlischkeit in Philippsbursch nit auf !

De „Feiergraawe“ war vum Marktplatz ausgehend ein „gleene Wassergraawe“ zum Lesche, wann’s irgendwu gebrennt hot  un isch heit e glaans nochempfunnenes Rinnsal dort ,

D‘ Kanonekuchle uff’m Denkmal solle uff’me Marktplatz-Denkmal uffghaift vun denne sei, mit denne Philippsbursch 1799 bombardiert un em Erdbodde gleich gmacht worre isch…un a viel Leit debai umkumme sin…

Un heit um die gleich Zeit leide in Brusl, wu’mer jetzt wohne, alle Brusler Kercheglogge… weil heit vor 80 Johr , am 1. März 1945 (also  gege End vum zweide Weltkrieg) Brusl noch bombardiert worre isch vun US-Bomber :  in’eme 45-Minudde-Oagriff sin 900 Sprengbombe und 49 000 Stabbrandbombe uff d’Schdadt runngerschmisse worre  un henn die zu 80%  in Schutt un Asche glegt. 1000 Leit sin debai umkumme..(.muss noch noochlese, wie’s domols em Brusler Nepomuk an de Brick gange isch…)

Geschdern owend (un heit morge in de Zeidung)  die Noochricht vum derzeidiche US-Präsident , wu en annere Präsident, wu zu Verhandlunge  bei’em war , nausgschmisse hot un ‚em vorgschmisse , er ded en 3. Weltkrieg provoziere, was der bschdimmt net gwollt hot …

Narre, Brickeheiliche , Bombe un Krieg…sin grad  in mei’m Kopf un mein’re Seel‘..

…was fer’en verriggde Dag ‚  !

Der Beitrag De Nepomuk un Bombe erschien zuerst auf Badische Gutsele.

Gschwätzde Setz‘ soll ma jo bekanntlich net ubedingt glei uff d‘ Goldwoog‘ lege…

Awwer wie isch’s  mit gschriwwenne un mit gedruckte ? Un wie isch’s mit denne, wu ebber Bschdimmts gelde, fa denjeniche gedruckt sin  un sogar vereffendlicht ? Un wie isch’s erscht recht dann, wann der, dem sie gelde, schun e Weil dod isch un koi Antwort meh druff gewwe kann un koi Schdellung dezu nemme, obwohl er’s gern ded ? Un weil er’s net kann,  sich dann im Grab rumdreht?

Vun wemm i’s hab und vun was ?

Vum am 20.Juni im ledschde Johr verschdorwenne Harald Hurst , wu fa viel vun uns Mundart- un Dialektschreiwer  e groß‘ Vorbild gwest isch  un so manchs vun uns erscht zum Schreiwe gebrocht ghat hot …

Ihm henn nämlich  in’eme effendliche Noochruf  „Zum Tode von Harald Hurst“  so bschdimmde Setz‘ gegolde, wu er sicher so net heere oder lese gwolld hdee un noch denne er sich , wie dieneniche, wu’en besser gekennd ghat henn, moane, dass er sich sicher denooch im Grab rumgedreht ghat hot…

’s war oafgangs November im ledschde Johr, do war er schun e ganzi Weil unner de Erd, wu en Stadtrat vun Ettlinge und AfD-Kandidat vum Landkreis vun derre Pardei in’emme Ortsblatt u.a. folgende Text vereffendlicht ghat hot :

„Zum Tode von Harald Hurst

(…) Denn während uns unter dem Synonym Vielfalt , neue Lebensstrategien und Werte zudiktiert  werden, von „kein Mensch ist illegal“, bis dahin, daß unsere Kinder nicht mehr wissen sollen, sind sie Mädchen oder Junge, gibt es etwas, daß uns alle eint: unsere Sprache. Sie zeigt uns, hier gehöre ich her , hier bin ich zu Hause, hier ist die Heimat meiner Vorfahren, die Heimat meiner Kinder. Und so verwundert es nicht, daß die Befürworter  der „Transformation unserer Gesellschaft“ gerade auch unsere Sprache angreifen und sie im Genderwahn bis zur Lächerlichkeit verunstalten.

Harald Hurst hat sich mit dieser Entwicklung nicht gemein gemacht. Das Bewahren unserer Traditionen , unserer Bräuche, unserer Dialekte ,war seine, ist unsere Art von Vielfalt. Ehren wir ihn, indem wir diese Vielfalt unsere Kinder lehren.Vielleicht im Sommer, bei einem Eis, dass wir an Harald Hursts Plätzle naschen. Helfen wir Ihnen  und uns damit, unsere Identität zu bewahren. Wenn unsere Kinder seine Bücher lesen und verstehen können, halten wir ihn so in Ehren, wie es ihm gefallen würde.“

…un domit ihn, wu niemols en Heimat-Dichter im engere Sinn sei gwollt hot, vor de AfD-Karre gschbannt hot, ob er’s gwollt hot odder net , ohne dass er sich noch wehre gekennd hedd un demm was Gscheits hedd entgegehalde kenne.

I finn jo so ebbes sowas vun gemein un hinnerhäldich , grad a wann sich’s noch oaheert wie aus’emme Märche- odder Bilderbuch (!) un war so froh, dass i dann noch hab lese kenne, dass sich zwai Däg schbeder  Familie un Freund‘ vun’m sich in sei’m Name degege gwehrt henn ( in de BNN)

Un drotzdem isch mer’s  no net wohl ums Herz…losst mer’s koi Ruh, wann i les, dass’es was gibt , das uns (wen?) „alle eint: unsere Sprache.“ Un de Harald Hurst “ im Bewahren unserer…Dialekte seine (= unsere ? ) Art von Vielfalt “  riwwergebrocht hawwe sollt.  „Mit ihr bewahren wir unsere Identität…“

Ded mol gärn wisse, wie’s Eich, wu dess grad lest, demit geht … (?)  Si’mer net all devu iwwerzeigt,wie Schbrooch un d’Identität  zammegheere und  wie wichdich sie sin ?

Awwer , dass d’Schbrooch a was sei solld, wu „uns alle eint“ ???

Vielleicht merkt’s der odder die anner vun Eich, dass mer uns mit manche so vertraude un toll glingende Werder  un Setz uff’emme ganz schmale Grat befinne, wu schnell neewenaus gedappt bisch(?)

…un wie wichdich dass’es manchmol doch sei kann, so manch’s Gedruckts uff d‘ Goldwoog‘ zu lege ?

-I moan jetzt net in Zaide vun de KI… do nadierlich a – awwer erscht recht  un allemol , wann’s drum geht wie jetzt do, wu Mensche zum Inschdrument vun ebbes gmacht werre…

Moant’er net a ???

Der Beitrag Ebbes uff d‘ Goldwoog‘ lege… erschien zuerst auf Badische Gutsele.

Bisch noch’eme ganz aigne Bauplan gebaut

un alles an’der isch ei’schdurzg’fährdet

net renoviert un net frisch gschdriche

fallsch meischdens durch’s Raschder

wärrsch oft aussordierd zu de zwaide Qualität

funktioniersch net immer, bisch awwer drotzdem koschtbar ,

wa’ma bedengt, dass Gott zu’der kummt

un in’der zu wohne gedengt

Willsch oifach debai sei middel im Lewe

oagnumme sei un en Dail devu

obwohl annerscht bisch

awwer doch e wertvolls Oinzelschdigg

uff derre ganze scheene Welt

un musch di net scheere misse um dess

was manche vun denne  „Normerfiller“

so iwwer di schwätze un babble

(diesem Text zugrunde liegt das Gedicht von Maria Sassin „Teilhaben“, von mir in Mundartform gebracht )

Der Beitrag Mit debai sei… erschien zuerst auf Badische Gutsele.

Awwer weh,du hosch im Haus drin gsuddlt , mit Wasser im Waschbecke odder in de Badwann rumgschbritzt un  iwwermäßich geplanscht  , dass’s  halwe Bad unner Wasser war odder wu annerscht  d’Meewl odder de Bodde versaut…dess war dann a gsuddlt…  Gwollt odder ugwollt , dess war egal, meischdens hosch frieher fa  so ebbes de A….voll odder e paar uff’s Hinnerdail griegt …

Wer vun Eich net ?

Der Beitrag „Suddlwedder“ und „suddle“ erschien zuerst auf Badische Gutsele.

Fernseh hot’s jo domols nonet gewwe , de Fernseher war do ’s Fenschder zu de Schdrooß naus un dodevor henn sich d’Oma odder de Oba gsetzt, ’s Kind uff de Schooß gnumme  und debai mit ehre meischd diefe Alde-Leit-Schdimm in’emme ruiche un gleichmäßiche Tonfall demm  sell Endlos-Märle verzehlt :

“  ’s war emol  en Dag wie heit

greggert hot’s un gschneit …

Ha- wer guggd’n do zum Fenschder rei ?

Nadierlich – de Unggl Fritz mit seinere große Peif !

Unggl Fritz, geh mol rei

un setz di uff’s Kanonebee (scherzhaft für’s Kanapee-Sofa)

un dringg e Glässl Wei !

Un de Unggl Fritz kummt rei,

setzt sich noa,

legt sei Peif uff d’Seit

dringgt en Schluck vun sei’m Wei

un fängt dann oa zu verzehle:

“  ’s war emol en Dag so wie heit

greggert hot’s un gschneit…..“    (usw… usf.).

Un dodebei sin d’Kinner immer ruicher worre, sin schee brav sitze gebliwwe un henn schiergar ’s Schnaufe vergesse beim Zuhorche.

I waiß net , wie oft seller „Unggl Fritz“ oafange gmisst hot  mit demm “ ’s war emol en Dag so  wie heit….“  , weil d’Kinner so gebloogt henn mit „Weidermache !“ und die Gscheide vun’enne gebeddlt henn:

„Nomol ! Nomol ! “   (???)

Der Beitrag Heitzudag schier nimmeh zu glaawe… erschien zuerst auf Badische Gutsele.