Am Vadderdag, am Vadderdag
gebt’s alles, was de Vadder mag:
In erschter Linie mol sei Ruh’,
danach Dei Mudder, dann kommsch Du;
e Verdele, e Bier vom Fass,
des gebt’s bloß in de Wertschaft, was
ihn deswege au duht verleide,
sich an dem Dag do rumzutreibe.
Mit andre Vädder oder Männer
werd er do schnell zum Witzekenner
un singt dann aa aus voller Bruscht:
“Des Wandern isch des Müllers Luscht”,
vor allem dann, wenn d’ Sonn noch scheint,
sin alle gleichsam laut vereint.
Ob jung, ob alt, zu Fuss, mit Rad
oder mit Motorrad grad,
Du siehsch die Kerle überall,
am Rhein, in Biergärde, mit Schall,
do hörsch se voller Lebensfreud
lache un johle wie net g’scheit.
Un kommt er endlich widder heim,
Du lieber Vadder, dann isch’s kein
g’standner Mann meh voller Kraft,
dann isch müd der, ohne Saft,
der braucht nix mehr, will bloß noch schlafe
un kann mitunner net grad laafe.

Am Vadderdag nach Vadders Art
isch aa noch Chrischdi Himmelfahrt.
Zum Glück muss ma als Mann bescheide
selbscht do noch uff em Bode bleibe.