29. Juli 2021

Aggression

Otto Arnold

Kommentare

Aggression

Die Erd hod schun werklich viel dorchmache misse,
de Eischlag vum e Komehd hed se mol faschd verrisse.
Mid dene Ihwel hod mer awwer seid alde Zeite erlebd,
dasses ned immer blohs schlimme Auswirkunge gebd.

De Komehd hod domols mid aller Macht
alle megliche Subschdanze uf die Erd gebrachd.
Ohne die, wenn mer se heit ned hede,
mir werklich ganz bleed gugge dehde.

Die Saurier hen des ned iwwerlebd,
un i ben a froh, dasses die nemme gebd.
Die Nadur hod sich ned lumbe lasse
un hod anners Lewe gschaffe in Masse.

So gsehe isch es wahrscheints so:
Die Wire un Bazille waren schun vor uns do.
Des zahld sich fer die sicher heid noch aus,
die sin uns immer en Schridd voraus.

Vielleicht erklärd die ganz Endwigglung jo aa schun,
warum Polidiger immer de zwaid Schridd vor em erschde duhn.
Des nitzd zwar nix, wie mer heid siehd,
aa wenn sich die Bolidig ofd arg bemiehd.

De Haubdkluh bei de Evoluzion
war awwer die Aggression.
Die Nadur hod des genau dorchdachd,
Dass Aggression koin Uhfug machd.

Sie hod im Ganze des Beschdrewe,
dass gleiche Sorde iwwerlewe.
Um die aigene Art zu erhalde,
muss se de Kampf gege annere gschdalde.

Des hod sich im Grosse un Ganze bewährd,
blos de Mensch hod des Syschdem geschdehrd.
Doch ischs bei Mensch un Tier a so,
dass sich Aggression umwende ko.

Wenn jemand dich mol ärgere duht,
dann hausch hald e Blummewahs kabut.
Die Aggression braucht e Vendil,
dann wechseld se a mol des Ziel.

Unsere wechselvolle Zeide
helfe die Aggression bereide.
Drum muss mer um sie abzulengge,
ihr immer Brot un Schbiele schenge.

De Weltschbort hod, so mechte sage,
viel zum Friede beigetrage,
weil soviel Dampf abglasse wird,
dass es die Mehrhaid nemme schdehrd.

OA0721

0 Kommentare

Einen Kommentar abschicken

Deine E-Mail-Adresse wird nicht veröffentlicht. Erforderliche Felder sind mit * markiert.