Jetz isch vun de Regierung beschlosse, dass unsere Soldade mit de Nato noch weider in Afghanistan bleiwe misse.
I frog me scho immer, wo do de Atlantik isch, fer den die Nato zuschdändich sei soll.
Mir sin jo widder mol als treie Vasalle von de Ami in den Schlamassel neigrode.
Awwer gugge mer des emol genauer oh.
Des Land mit ¾ Gebirg isch faschd dobbeld so groß, wie unser Bundesrepublik, un
had awwer wenicher als halwer so viel Eiwohner wie mir. Des sin viele oinzelne Schdämm, wo sich dauernd um die Vorherrschaft rumschlage.
Des isch schun seid Johrhunnerde so.
Im nainzehnde Johrhunnerd hod dann des russische Zarereich un des britische Empaier, des wo mid Indie en Nochber war, gmoind, dass se des alloinich ho sotte un hen dauernd rumkriegd.
Noord sin awwer in Afganistan  die Kommunischde hochkumme, des hod dene Nichd-Kommunischde  ned gebasst un es sin dauern Kämpf ausbroche. Drum isch die russisch Armee dann zu Hilf kumme. Do ware awwer die Brite degege, un dann hots hald dauernd Krieg gewe bis sich zu de Johrhunnerdwend e Oinichung ergewe hot. Dezwische hen se dann noch e Grenz zu Indie feschglegt un es isch a Pakischdan eigricht worre. Jetz hedde jo die Afghane Ruh gewe kenne, war awwer nix.
1979 hen sich die Komunischde and Machd geputschd un e Johr druff war en Gegeputsch. Un drum sin dann sovietische Truppe eimarschierd. Nach zeh Johr dauerschdreit hen se dann ufgewe un sin abzoge.
Die Taliban ware ab 1996 an de Machd un die Amerikaner wollde des Machdvakuum  noch em Abzug vun de Russe fille.
Was jetz war, kammer nemme beschreibe , so groß war des Dorchenanner, Taliban, al-Quaida, Islamiste un alles was sunschd noch kämpfe kenne hod, isch gegenanner gange, un die Ami hen a nemme gwissd, was was isch, un wer mid ihrene Waffe uf wen schiesst.
Un wie die al-Quaida des Attentat in USA veriebt ghad hot, hod die US-gschdeierde UN de Verdaidichungsfall erklärt un die NATO isch mid de ISAF-Truppe eimarschiert.
Un so sin unsere Soldade dort driwe glandt.
Sie  dähde hauptsächlich Ausbilderufgabe erfille un koine Kampfeisaetz  mache.
Awwer ich denk, dass mer des net vermeide kann bei dem Dorchenanner, es  isch jo aa schun vun Etliche feschdgschdellt worre, dass des koin Sinn meh machd.
Noch dere Eilaidung kanne jetz sage , wo e aigetlich nohwill:
Armee werre dezu eigsezd, um Mißschdänd zu behewe,
die es ohne Armee garnet däht gewe.
Die Erkenntnis, dass en Krieg blos Verlierer kennd, un des maischdens die kloine Leit treffd, wo sowieso zwenich hen, isch immer no nergeds owe ohkumme.
Aus de Gschicht lernd scheinz aa nermerds ebbes.
Vor oinicher Zeit sen se bei uns iwwer die Varusschlachd un iwwer de Armin de Kerusker am berichde gwesd.
Was wichdich isch: die Römer ware als Bsatzer in Germanie.
Do isch de Armin dann zu de Römer gange un hod sich iwwer die Legione un die
Kampfweise vun de Römer gud ausbilde losse.
.Un wie er alles kennd hod, isch er widder hoimkumme un hot seine Leit zaigt, wies geht. Un dann hen se de Varus mid seine Legione aus em Land verdreibe kenne.
Jetz schule unsere Soldade die Afghane, wies gehd un wie mer mid dene Amiwaffe uns alle widder vertreibe kann.
Hoffendlich warde mer net so lang…………