Badische Gutsele
präsentiert von un im badischen Blog (c) 2019-2021

Der badische Blog!

Mit einem wöchentliche Beitrag, Montags oder Mittwochs oder ganz spontan:

 

Neueste 5 Einträge

  • Herbscht, mol widder
  • Für em Bernhard sei Bade(n)kanal
  • Es ghöre immer zwai dezu
  • Untergàng vo U-Boot made in France
  • Isch de Ball noch rund? (Essay)

2021-09-05

Machd machd……

Machd machd……

Übertreibung ruiniert die Demokratie, moint schun de Aristoteles.
Wemmer de oine oder annere Dail vunere Verfassung extrem belaschded,
dann werd mer die Verfassung zerschd verschlechdere un schließlich iwwerhaubd zugrund richde.

Was sich e kloine Grupp awwel do rausnemmt, isch sicher iwwerzoge.
Do kennde sich unser Freihaidsfanadiger mol drohmache.
Wie die Freihaide vun de ganz iwwerwiegende Masse von Midbirger beschädigd werre, isch sicher meh, als e Mund-Nase-Maske-Vorschrift verursache koh.

Es isch schun komisch, awwer dodezu fallt mer grad des Kinnermärche vum
Fischer un seinere Fraa Ilsebill ei.

Mir Gwerkschafter henn noch em Krieg schun aa heftiche Kämpf ausgfochde, awwer es war immer en Rahme, der wo zu de Forderunge noch bassd hod.
I heb awwer in meim Berufslewe aa mol miterlebd, wie e kloine Grupp Ost-gschdeierder Kollege mit so eme Verhalde zwai Firme ind Insolwenz gedriewe un somid Arbaitsblätz vernichdet hot.

Wemmer e bißle Hischdorie bedreibt, dann gebts aa noch Anneres dezu..
Zum Beischbiel henn im Mudderland vun de Demokratie aa so Gripplen Macht
ausgnitzd. So hod domols uf de Elektrolokomotive immer noch en Haizer mitfahre misse, damit se net umlerne gmiest hen.
Die Wertschaft  vun de Insel war domols schdark uf Kohle eigschdelld,
un die Bergarbaidergwerkschaft hot entschbrechend so uff de Putz ghaue,
dass die ganz Wertschaft rickwerts gange isch.
Do hod dann die Margret Thatcher mid ihrer Regierung die Gsetze geännerd un die Machd der Gwerkschafde begrenzt.
Des hen se also mid ihrener Iwwertreibung erraichd.

Vielleichd gebts bei uns doch noch Richder, die sehe, dass es in dem Fall koin Lohnkampf meh isch, sondern en Machdkampf gege die annere Bahnkollege.

Aa wammer jetzert Wahlkampf  henn, ännert sich scheinz an unserer Bolidig nix.
Alle schwinge se große Rede, was WIR mache missde un was richdich wär, awwer  mache? Mindeschdens bis uf die nägschd Regierung wird alles nausgschowe.
Mol sehe, was dann werd………….

OA0921

Otto Arnold - 15:28:46 @ Otto Arnold | Kommentar hinzufügen