Er war immer da für mich. Immer, wenn i’n gebraucht hab. Hat mi nie im Stich g’lasse. Do hat’s nix gebbe, uff den hasch Di verlasse könne, egal, was war. Er war de allerbeschde Kumbl, wo i jemols g’habt hab. Er war halt scho was B’sonneres. Au wenn d‘ Leut am Aafang g‘meint habbe: „Wart’s ab, mit dem wersch noch dei blaues Wunder erlebe!“ Un stimmt scho: Blau war er als. Ab un zu hat er Stoff gebraucht, jo, was zum Saufe halt, aber aa net meh wie annere. Trotzdem isch der g’loffe wie e Eins, nie zickzack, immer gradaus, de Nas nach. Beim Rumrödle hat er nie schlapp g’macht. Schnell war er, Ausdauer hat der g‘habt, der war e Sportskanon! Was hab ich mit dem für tolle Bergtoure mache könne, in Öschtreich, im Schwarzwald. Wenn ich aus de Puschte komme bin – der nie! Mit dem isch’s richtig abgange! Aber im Allgemeine isch er g’mütlich g’wese. So einer zum Aalehne, treuherzig, tolerant. Liberal eig’stellt un aa sonscht für alles offe.
Mit dem hasch in de Stadt flaniere könne. Der war immer wie g’lackt von obbe bis unne. Do habbe sich d‘ Leut als umgedreht. Er hat aber au saugut ausg’sehe, der Kerl! Der war au immer gut druff un hat immer für mich Zeit g’habt. Jo, manchmol hat er vielleicht e bissel vor sich hiegebrummt, wenn em was net gebaßt hat. Wenn i’n zammeg’schisse hab, er soll net so uff de Überholspur lebe. Ab un zu hat er e bissel übertriebe mit seiner Energie un isch leichtsinnig worre, do hab i g’sagt, er soll mol widder en Gang runnerschalte. Klar gab’s au Höhe un Tiefe, un machmol hema uns mit uns’re Aasichte im Kreis gedreht. Danach hab i mi als g’fühlt wie g’rädert. Andrerseits konnt i mi so schee als in en neikuschle. Un finanziell bin i aa gut mit em g’fahre.
Mei Eltern wollte jo immer, dass i unner d’Haub komm un mi mit oim verkupple, wo Kinner will. Aber mir hat’s g’langt, wenn i alles unner Dach un Fach g’riegt hab. Nai, ich wollt frei sei, dauernd unnerwegs, über d’Straße brettere un net wie mit aagezogener Handbrems daheim versauere. Des, was mir zamme erlebt habbe, kann ei’m keiner meh nemme: Abenteuer, Irrfahrte, Urlaubsverwicklunge, Wolkebrüch mit Blitz un Donner, Schneeverwehunge, Eisrege oder ball 40 Grad Hitz. Mir habbe uns de Wind um d‘ Nas wehe lasse, d‘ Hauptsach, mir ware zamme. Un mir sin beide uff wilde Rockmusik abg’fahre, des hat uns noch meh zammeg’schweißt. Durch Dick un Dünn isch er mit ma gange.
Aber dann isch er in die „Jahre“ komme. D’ Feuchtigkeit isch em in d‘ Glieder g‘fahre. Überall hat’s geklemmt un g’hakt. Der war plötzlich so kleilaut, als wenn er im G’schäft einer uff de Deckel g’riegt hätt! Der hat eifach koiner meh hoch g’riegt! Hat mi mit Sack un Pack vor de Dür stehe lasse statt ma zu helfe un war au sonscht kei großes Licht meh. Do hab i mi von em getrennt – nach 21 Jahr. (!) Hab en zum Abschied noch emol ganz lieb g’streichelt. – Er hat nix g’sagt dazu. Ich glaub, er hat’s gar net so richtig erfaßt, do hinne, in de Gablonzer Straß.
Ach, es duht ma so leid! Mei Herz duht ma weh, wie i’n do so eisam stehe seh! Mach’s gut, mei Freund, mei treuer Kamerad! Ich wünsch Da noch e schöne Zeit, vielleicht im Ausland mit erer wunderhübsche Polin oder so. Ach, mei liebes Flitzi, Du tolles Cabrio, unser aquablauer, unvergeßlicher Opel Tigra!
O Petra, so wie ihr e Herz un e Seel‘ wart mitnanner, isch dess gar koi Froog, dass der „Opel Tigra“ a e Seel‘ hawwe gmisst
hot, an wann’er‘ immer gloijlauder worre isch….awwer wen wunnerts ?
Mit dem Gschichtl hosch’m jetzt jo e Denkmal gsetzt und dess isch gut so !