Des isch jetzat ä komische G’schicht, die ich Eich verzähl, und die ich selwer net hätt glaube welle, wenn ich’s net persönlich erlebt hätt.
Des hat sein Anfang g’hätt, im Oktober 1985. Zu derre Zeit häb in bei de Europäische Weltraumbehörde, ESA, g’schafft, im Satellitekontrollzentrum, in Darmstadt.
Mir hän Forschungsflüg‘ ins All durchg’führt und Raketemissione‘ bis weit ins Sonnesyschtem nei!
Ich war sellemols in de Schrottabteilung ang’stellt. Alla! Net falsch verstehe! Domit mäun ich Weltraumschrott! Also: des ganze Zeugs, was do owwe um unsern Planete rummenum fliege dud. Ä Kollission mit so ebbes isch jo net ohne!
Äuns muss ich noch klarstelle:
In de Fuffziger und Sechziger Joahr‘ sin‘ mir scho mit Digitaltechnik befasst g’wäse. Mords-elektronische Rechenanlage wared scho im Ei’satz.
In de Siebziger hat ma sich mit Mikroprozessore und Speicherprogammierte Steuerunge b’schäftigt. Und! Mit de erschte Vorläufer vom Internet!
S‘ www, World Wide Web, kam jo erscht in de Neunziger uf, gell?!
Z’rück, in de Oktober ’85 – zum Anfang von de G’schicht.
Grad war ich in äm Funkkontakt mit äm Satellit. Des war so än ganz spezielle Schrotthaufe-Sucher-Satellit g’wäse. Do häb ich soo ä Luscht uf än Kaffee ‘kriegt.
Mit Stolz kann ich verzähle, dass ich mir seinerzeit ä Super Elektronische Kaffeemaschin selwer z’samme gebaut g’hat hätt. Fliege konnt’se jetzat net, wie heitzudag so ä Drohne, awwer so ebbes wie mein Kaffeeautomat‘ hat käuner b’sesse.
De Kaffee war de beschte üwwerhaupt. Find ich.
Awwer irgendwie isch mei Kaffeemaschin‘ mit äm Synchron-Funk-Impuls von demme Schrotthaufe–Sucher-Satellit z’sammegekomme. Ä undefiniertes Signal hat sich selbstständig g’macht, und wurd‘ äufach in ä Richtung vom Weltall g’funkt, wo’s nix zu suche g’hat hätt.
Nachdem seller Funki-Funki dreizehn lange Joahr lang unnawegs g’wäse isch, isch er dann bei äm annere Kolleg angekomme. Und der isch in demm Moment an säum selwer gebaute Getränkeautomat g’stande. Do hatter mit Entsetze zugugge müsse, wie des verdummbeidelde Funksignal von mir, bei ihm a‘kommt, und sein geliebte Automat kurzerhand hie g’macht hat. Sei Maschinle hat geblinkt, gequalmt, g’stunke und g’furzt.
Der Kerle hat än richtige Wutanfall ‘kriegt. Seller Kolleg war awwer jetzat än Bewohner von äm ganz annere Planete! Lichtjahre von uns entfernt!
Er hat bei ännere Raumschiff Vermietung g’schafft.
Mei mörderisches Funksignal konnter zu allem Elend ziemlich schnell z’rück verfolge. Druff hatter sich äufach ins näkschte Turbo-Sport-Raumschiff nei g’hockt und isch abgezischt.
Richtung Darmstadt.
Äm Universum machts jo käu Unnerschied, ob än Komet uf äun zukommt, än cholerische Alien, odder ob ä Rotweinglas umkippt. Äm Universum isch des alles ganz äufach: wurscht. Ma muss irgendwie sei Ferz selwer regle.
Jetzat mach ich mol än Zeitsprung!
S’war net lang nach de Corona Pandemie. Ich bin an demm Dag länger im G’schäft g’wese. Ich häb do wirklich viel G’werch g’hätt. S’war dann scho bissle bisse dämmrig, als ich mich endlich uf de Häumweg häb mache könne. Do isch plötzlich ä Kaffeetass an mir vorbei g‘floge!
Wisster, grad so ä große Kaffeetass‘, wie ich se selwer gern benutze du, weil do viel nei basst! Uf’m Rase isch se ufgedotzt, ohne awwer zu zerbreche.
Do häb ich bemerkt, dass die än Deggel hat, und der isch ufgegange, und plötzlich isch so än winzig kläuner, daumegroße, Kerle ausg’stiege.
Der hat richtig gebrüllt! Echt cholerisch isch mir des vorgekomme:
„Aha! Häb ich dich abgebasst!“
Ich war komplett verdaddert :
„Was willsch jetzat Du kläuner Fritzel von mir?“
„Kläuner Fritzel?“
Hatter mich nach g’äfft.
„Lieber kläu und zackig, als dumm und dabbig!“
Und dann hatter sich middem Krakeele gar nimmer ei’gekriegt.
Er hat mir die ganze G’schicht, mit mei’m Funksignal und sei’m kaputte Getränkeautomat zum Vorwurf g’macht. Sei Getränkeautomat hätt ma net mit meinere läppische Kaffeemaschin vergleiche könne, hatter erklärt. Sein Automat hätt sogar fliege könne, und zwar immer do no, wo er’än gebraucht hätt.
In äm ruhige Ton wollt ich jetzat mol de-eskaliere, und häb g’sagt:
„Und desdewege kommsch du denne lange Weg – Lichtjoahr lang – doher? Also ich denk mir, wenn du widder häum kommsch, bisch du jo uralt!?
Awwer de Alien hat g’mäunt:
„Due‘ dich mol net irre! Gegge mei Lebensspanne, hasch du ä Lebe so lang wie ä Eintagsfliege!“
„Eintagsfliege?“
Häb ich mich g’wundert.
„Ja, Eintagsfliege! Schreib dir’s ruhig hinner die Ohre!“
Und er hat noch äuner druff g’setzt:
„Ich war scho ä paarmal uf eier‘m Planete do.
Ich mach des im Hyper-Super-Flug Schlof! Do bin ich im Null Komma Nix do, und in im Null Komma Nix widder dohäum.“
Jetzat war ich dann doch sprachlos. So ebbes muss ma erscht mol im Hirn sacke lasse könne.
Grad do isch plötzlich d’Frau Stiegler üwwer de Platteweg doher g’loffe ‘komme.
„Scheene Feierowed!“
Hat’se mir fröhlich g’wünscht. Im Laafe hat’se mich net aus de Auge g’lasst. Ich denk, ich häb do grad net so gute Figur abgegäbbe. Und so isch‘se dann voll uf denne Alien druff gedabbt.
Bei ihr’m Weiterlaafe häb ich noch g’sehe, wie er an ihre Schuh gebäbbt isch.
Nur!
Ihr werdd‘s kaum glauwe!
Weil die Frau Stiegler so hohe Absätz g’hat hätt, isch de Kläu‘ net z’samme g’matscht worre, sondern, er hat sich in Todesangscht an de Stöckel von denne Schuh‘ feschtgeklammert.
Zuletscht hatter sich mit äm Hupfer aus de Gefahrezone befreit, und glei widda zu mir nüwwer g’macht!
Ich häb g’sagt:
„Jetzat hosch awwer echt Glück g’hätt.“
Und er? Fuchsdeifelwild:
„Was war jetzat des für ä blindes Huhn? Mir langt’s mit eich!“
Und druff hatter g’rufe:
„Wie du mir – so ich dir!“
Und dann noch:
„Auge um Auge – Zahn um Zahn!
Mein isch die Rache, spricht de‘ Herr!“
Wie de Blitz hatter sich zuletscht umgedreht, isch in sei Kaffeetass nei g’sprunge, und – in null komma nix – abgedüst.
Wie ich ihm do hinnerher geguggt häb, war ich noch ganz benomme. Do ging ä Fenschter uf, und äuner hat g’rufe:
„Herr, Kollege!“
„Waaas?“
Häb ich gedankeverlore g’fragt.
Und do hat der g’sagt:
„Dei‘ komisch Kaffemaschin‘, die blinkt und qualmt und stinkt und furzt!“
Tja, Ihr Leit, s’End von derre G’schicht:
Ich häbb dann d’Finger vom Universum g’lasse,
bin mit 63 in Rente ‘gange,
und so kann ich jetzat noch
mei kurzes Lebe’
ganz in Ruh‘ genieße.
Awwer!
Äuns könnter mir glaube: d’Auge halt ich immer uf.