Mach mi zur Sau oder zur Schneck,

zum Rindvieh, Hornochs, Trambeltier,

zum Köter mit un ohne Dreck,

zur dörre Gaiß uff alle Vier;

von mir aus aa zur alde Muck

oder zur arme Kirchemaus,

zur Seekuh, lahme Ent, ruck-zuck,

zum Sauigel im Stinktierhaus.

Dreckspatz, Schluckspecht, G’witterzieg.

Spinatwachtel, des wär doch schee,

Daigaff mit de Schnepf im Ried,

schwanzlose Ratt dät aa noch geh.

So’n Affepinscher net vergesse

oder e Faul- un Tränetier,

dank Pleitegeier vom Kuckuck b’sesse,

der wo als klebt an dere Dier.

Vom Brummbär, Angschthas, do isch d‘ Red

oder Rhinozeros schiergar,

vom Esel, wo scho immer bleed,

zur Brilleschlang, wo falsch noch war.

Oder so Schneegäns, wo noch jung

un dumm sin, faul wie‘n Schweinehund,

vom Lama bis zum blinde Huhn

un Immobiliehai mit Grund.

Schnapsdrossle un Rabemüdder

komme aa net besser weg,

me hat se alle degradiert,

die Viechlen ohne Sinn un Zweck.

De Mensch, des Wunderwerk der Schöpfung

isch jo so g’scheit, des haltsch kaum aus,

der baut sich jo als oinziger

kei Nescht, sondern e ganzes Haus.

Er landet sogar uff em Mond

un fliegt do immer widder naa,

obwohl der gänzlich unbewohnt

jetzt isch, un so, so bleibt er aa.

Spirituell, des will der sei,

dabei basst dem sei bissel Goischt,

wenn’s hoch kommt, in e Fläschle nei,

wo Spiritus sei Dienscht noch leischt.

Stolz un uffrecht duht der gehe,

eigebildet ohne End,

duht sich als was B’sonners sehe,

weil schwimme, fahre un aa fliege

überall hie er schließlich könnt.

Dabei hat’s der Kerl im Kreiz,

werd mit der Zeit jo immer fetter,

verweichlicht, süchtig nach ‘me Reiz

vertragt der net emol meh ’s Wetter.

Immer duht der spindisiere:

Sei Existenz – warum, woher?

Des duht zur Weltfremdheit bloß führe.

Werre, vergehe –  ’s isch net mehr!

Für Fetzelen lumbich’s Babier,

do duht der b’scheiße, lüge, morde,

un wer’s net klaut, der schafft defür,

er nennt des „Geld“, un duht’s gern horde.

En „Edelmann“ hat’s frieh’r mol gebbe,

des isch aber scho arg lang her,

als „Haderlump“ in diesem Lebe

kannsch en bezeichne immer mehr.

Des isch e Schand, was ihr do treibt,

un wie ihr mit de Welt umgeht,

die ausbeutet, euch eiverleibt

un euch als „Herrscher“ do versteht!!

Alles künschtlich, technisch, doot,

Materie ohne Lebe drin,

verkauft die Seel grad ohne Not –

e Saubande, bloß Gier im Sinn!

„Macht euch die Erde untertan“

heißt’s scheint’s in Eurer Religion,

doch gab’s von eurer Brut, die kam,

damols no net so viel davon.

Ich seid doch alle nimmeh sauwer,

in Hern g’schisse do hat ma eich,

statt zammestehe, Streitgeplauder,

‘s isch korz vor 12 für arm un reich.

Ihr schaurig’s G’sindel, assoziales,

schert eich zu Deifel un gebt Ruh!

Doch ’s Allerschlimmscht – ‘s isch was Reales:

Ich g’heer do nämlich aa dezu. (!!)

Oh, lieber Gott, ich bitt Dich heut:

Mach ma in mei’m negschde Lebe

nur die einzig große Freud,

un laß mi so e Viech abgebe!

So e Tierle ohne Falsch,

wo bloß fresse will un schloofe ,

von mir aus bloß von hier bis Malsch

mit sei’m Schätzle als will schwoofe.

Wo sei Grips ganz uuverbraucht,

damit sei Art do halt net endet

eigens zum Überlebe braucht

un für de Herdetrieb verwendet.

Wo kei Waffe kennt, kei Krieg:

Vielleicht e weiße Friedenstaub,

wo ohne Ehrgeiz für en Sieg

schwebt über Nadelbäum un Laub.