Bewegte Männer

Autsch, des kneift! De Hosebund hat entschiede gnug von de Feierdagsvöllerei un schreit nach Abhilf. Gute Vorsätz zum neue Johr hawwe mir diesmol gschenkt. Awwer mei schlechts Gwisse flüschdert mir trotzdem penetrant ins Ohr, dass e bissle Sport koin Schade wär. Prompt geht im Haus e mords Gebell los. Noi, mir hen koine Haustiere. Was do jault, isch de innere Schweinehund. Der wird weitgehend niedergrunge. Weitgehend deshalb, weil ich mit em Auto ins Fitness- Studio fahr. Mer derf sei Motivation net glei üwwerstrapaziere.

Ganz offesichtlich hen anner Leut die selwe Üwwerlegunge angstellt: de Parkplatz vor em Studio isch rappelvoll. Ich find des isch e Zoiche! Des soll heut wohl net sei mit dem Sport. Ich bieg rechts ab un mach me uff de Hoimweg. Awwer nur bis zu de nächschte Querstroß, dann dreh widder rum. So schnell gebt mer net uff! Ich park halt e bissle weiter weg un dank em kloine Spaziergängle lauf e mit uffgwärmte Muskle in de „Folterkammer“ ei.

Dort wird schwer gschafft. Fünf Weibsleut un zwoi Kerl sen scho im Kampf gege die Feierdagsünde. Ich gugg, wers isch un denk: „Herr im Himmel, de Schnaufer isch debei!“ Gnau gnomme sins sogar zwoi von dere Sort. De oine steht  uffem Crossstepper un keucht sich sei Seel aus em Leib. Nach jedem zwoite Schritt machts „pf“. Schritt, Schritt – pff, Schritt, Schritt – pfff. Un jedes Mol wird noch e „f“ draghängt. Ich find, so arg schnell isch er jetzt oigentlich net unnerwegs – awwer e Gschnauf, wie wenns uff de Michelsberg nuffging.

Die fünf Weibsleut strenge sich au an – awwer sie mache des damehaft, un fascht möchte mer sage elegant. Do schnauft un ächzt nix. Do werre vielleicht emol die Zähn zusammegebisse, awwer des hörsch wenigschtens net.

Ich selwer bloog me am Bizepstrainer un do hewwen so richtig im Blickfeld, den annere Schnaufer. Er kniet uff de Gymnaschtikmatt un übt Katzebuggel un Hohlkreiz im Wechsel. Hey, des mache se in de Senioregrupp! Awwer der Schwerathlet macht e Gschnaube un Gepruschte debei, wie wenn er Zentnersäck stemme tät. H – pffft, h – pffft. Er hat noch Steigerungsmöglichkoide un baut en Vokal mit ei: ha – pffft, ha –pffft.

Ich sitz fünf Meter weg un trotzdem flattert jedes Mol mei Pony, wenn der pruschtet. Warum mache Männer des? Weil se so stolz uff sich sen, wenn se mol vom Sofa runnerfinne un sich bewege? Fühle se sich an dene Geräte dann alle wie kloine Schwarzeneggers? Odder wolle se am End die Damewelt beeidrucke? Awwer do bin ich stolz uff meine Mädels: koi oinzige schielt zu em nüwwer außer mir!

Immerhin, Durchhaltevermöge hat er! So schnell gebt der net uff. An de Funktionsstemme hat er noch Steigerungsmöglichkoide. Dort drückt er mit mords Gedees die Gwichtsplatt hoch un schnaubt zum Erbarme. Ich geh hinnerher ans Gerät, um emol zu linse, wieviel er druffgepackt hat – bstimmt 700! Dass e net lach, was les ich do? Mickrige 450! Do pack ich locker noch zwoi Platte druff un stemm se lautlos! Hat der des jetzt mitkriegt? Jedenfalls schmeißt er s’Handduch. In dem Fall hoißt des, er legts zsamme, marschiert in d’Umkloide un macht Schluss für heut.

De Rescht vom Training kanne akkuschdisch ubehelligt absolviere. Wie ich hoimkomm sitzt mei bessere Hälft unbewegt un gmütlich uffem Sofa. Gut so, denk ich im Stille!