D‘ Weihnachtsb’scheerung beim Onkel Fritz

Von alle Onkel in der Schtadt

Hat keiner so viel Witz,

Isch keiner ang’legt so ideal,

Als wie der Onkel Fritz.

D‘ Geburtstäg, d‘ Daufe und was sonscht

Kommt in Familie vor,

Deß würzt der gute Onkel halt

Mit Witz und mit Humor.

Unn wann er Märche als verzählt,

Wer do sich alles freut,

Doch s‘ Schönschte isch beim Onkel Fritz

Halt doch die Weihnachtszeit.

Nor eimol isch deß Weihnachtsfescht

Ganz jämmerlich mißglückt,

S‘ hätt net viel g’fehlt, wär’s Haus abbrennt

Unn alles wär verschtickt.

Do dran war norr der Kaufmann schuld,

Dann der verwechselt d‘ Kischt,

Unn giebt schtatt Zimmerfeuerwerk

Em Onkel „Römischs Licht.“

E römischs Licht, deß isch was Schöns,

Doch norr im Freie draus,

Wann’s seine Feuerkugle schmeißt,

Noch höher wie e Haus!

Deß gibt e B‘scheerung, wie ganz g’wiß

So schön noch keine war,

D‘ Großväter selwer mache mit,

Trotz ihre weiße Haar.

Die Kinder sinn schon alle do,

Unn d‘ Tantene erscht recht,

Unn d‘ Hausleit, d‘ Mädle, ja sogar

Der Lehrling unn der Knecht.

Der Onkel Fritz gibt denne drei

Verwandte alte Herrn

Deß harmlos Zimmerfeuerwerk

Mit seine Silberschtern.

Unn sagt, wanns Lied verklunge isch,

dann zündet d’ers glei‘ an,

S‘ Chrischtkindle schwebt durchs Zimmer, unn

Die Schtern erschtrahle dann.

Jetzt tönt von inne schon s‘ Klavier,

Sie singe „Schtille Nacht,“

Der Onkel hat dann bei demm G’sang

Noch s‘ Gaslicht dunkel g’macht.

Wie’s Lied noch net verklunge war,

Glust’s schon im Sofaeck

Drei Funke drehe sich im Kreis,

Jetzt kommt der Knalleffect.

S‘ Chrischtkindle ganz in weißem Tüll,

Schwebt grad in’s Zimmer rein,

Uff eimol laßt’s en Krach, mer meint

Jo s‘ ganze Haus fällt ein.

Enn Feuerschtrom ergießt sich glei

Wie wüthich hin unn her,

Dazwische sauße Kugle rum,

Unn schtinke duht’s noch mehr.

Grad wie drei Deifel hopfe die

Drei alte Herre rum,

In alle Farbe schieße se

In’s eige Puplikum.

Deß war e G’schrei, e Dunkelheit,

En Schrecke, Kinderg’heul,

S‘ Chrischtkindle brennt, der Deppich glust,

Do fallt ein’s in der Eil.

Die Kugle zische hoch unn dief,

Deß Hopfe un Gebück!

Do fliegt e blaue Kugel grad

Der Hausfrau in d‘ Perück.

Sie kriegt e Ohnmacht, unn e Bas

E Brandblas grad uff d‘ Hand,

Der Schwiegermutter brennt’s e Loch

In’s seid’ne Sonndagsg’wand.

Jetzt saußt e Kugel in’s Klavier,

Dort kriegt e Kind fascht d‘ Gichter,

Do halte zwei der Athem an

Unn kriege blaue G’sichter.

Doch endlich isch deß Feuerwerk

Dann nach unn nach verlöscht,

Der Onkel macht kei Feuerwerk

Mer amm=e Weihnachtsfescht.

Nadierlich sinn se an der Baum,

Nord ohne Sang unn Klang.

Zwei Schtunde ware d‘ Fenschter uff,

Unn g’schtunke hats noch lang.