Zammehogge im Altweiwersommer

Ha freilich! Setze Se sich gern zu mer hie.
Numme net scheniere! Der Platz isch noch frei.
Bittschee! Do isch doch – waiß Gott – nix debei,
a wenn mir zwai uns noch net kenne – Sie un i.
S’isch doch zu zwait allemol scheener wie mudderseelealloi.
Un bei so ere Fraid für’s Aug sag i doch net Noi!
Gönne Se sich in meinere Gsellschaft ruich e kurzes Peisle.
Von dem viele Her un No sin Sie jo ganz aus em Heisle
un – so wie’s aussieht – total hinnerefier.
Glawe Se mer’s, do sin Se genau richtig bei mir.

Seh’n Se – kaum sitze Se mir so vertraut wiesawie,
wirke Se von jetzt uff glei irgendwie erholt un entspannt.
Spüre Se net a so en Hauch von Sympathie?
Vielleicht sen mir zwai sogar wesensverwandt?!
Gugge Se doch net weg! Wie bitte?! I soll net üwwertreiwe.
Gut! I bin still, wenn Se dann noch e bissle do sitze bleiwe.
I hoff, Sie fühle sich a ohne ebbes sage zu solle bei mer wohl.
Vielleicht treffe mer uns irgendwann noch emol?
Ah! Sie müsse jetzt weiter un wisse net gnau, wohie.
Was moine Se? Mit eme Date klappt’s wahrscheints ehner net.
Also i hätt do gwieß nix degege ghett.
Awwer s’war schee, dass mer uns troffe hen
un e Weil so hautnah beienanner ghoggt sen.

Schad! – s’war fascht schon so e Art Seeleharmonie
zwische mir – un dem Schmetterling uff meim Knie…