Verzoggt

S’Läwe isch mitunner e beschissenes Spiel.
Net selte riskiert ma zu schnell zu viel.
Ma guggt sei Karde o un ma moint ma hot
uff de schon mit Brandnarbe iwwersäte Hann
e Blatt, mit dem ma aigentlich gwinne sott
un uff des ma bedenkelos alles setze kann.

Full House! – Ja, du hosch richtig gseh!
Des mießt jo mit em Deifel zugeh,
wenn’s desmol net mit dem Supergwinn klappt.
Du hosch im Gaischt schon denooch gschnappt.
S’därf sich endlich a emol für de rendiere.
Mit drei Kenig un zwai Dame kannsch net verliere!

Du gehsch bei jedem Eisatz mit un willsch gugge.
Do legt en Annere vier Achter uff fe Disch –
un du musch wohl odder iewel schlugge,
dass’d widdermol hochkantig neidabbt bisch.

Wer waiß wie oft hosch des Spiel mit em Feier riskiert
un hosch’s – uff gut Glick – mit eme „All in“ probiert.
Schon zum x-te Mol bisch knapp drunner bliewe.
S’Verliere musch du gwieß nemmeh iewe.

I kann dir bloß winsche, dass’d endlich kapiersch:
S’gebbt en oifache Weg, dass’d garandiert net verliersch.
Den sottsch dir deitlich lesbar uff d’Fingernäggel schreiwe.

Lass’ bleiwe!