Du lieber Himmel
Letschte Sommer hen mir e bsonnere Sonne-, Mond- un Sterne – Erfahrung gmacht, die e im Noochhinein net misse mecht. Mir wollte uns an unserm Hochzeitsdag ebbes Außergwehnlichs gönne un hen bei strahlendem Sonneschei un mit Blick uff en deitlich sichtbare Halbmond uff de Veranda vun sellem ehemolige Sternerestaurant z’Middag gesse. Die glischdemacherische Beschreiwunge vun de Gerichte uff de Tageskart ware e echte Tschällensch un von de dezugehörige Preisgestaltung kann ma mit Fug un Recht s’Selwe sage. Awwer s’ausgwählte Menü hot vom Amüsgöll bis zum Dessert vorzüglich gschmeckt un war allemol sei Geld wert. Mir hen den himmlische Auge- un den kulinarische Gaumeschmaus so lang wie meglich auskoschte gwellt. Wu e schließlich zum Zahle gwunke häbb, war scho Zwai vorbei un de Mond war immer noch als blasser Halbkrais am tiefblaue Himmel auszumache.
Mir isch der Matthias Claudius – Vers in de Sinn komme: „Siehst du den Mond dort stehen? Er ist nur halb zu sehen und ist doch rund und schön. So sind wohl manche Sachen, die wir getrost belachen, weil unsre Augen sie nicht seh’n.“ Dass die Zeile aus sellem Obendlied emol bei eme Middagesse in eme noble ehemolige Sternerestaurant stimmig sen, hätt e mer net träume glosst beim Auswennichlerne domols vor iwwer 60 Johr. I häbb dann awwer uwillkürlich a an des denke gmießt, was weiter hinne in dem Lied kommt, wu’s von uns eitle Menschekinner haißt: “Wir wissen gar nicht viel. Wir spinnen Luftgespinste und suchen viele Künste, und kommen weiter ab vom Ziel.“
Meh hot er mer scheints an dem Dag net sage gmecht, de Mond, denn wu e nochemol zu em nuffguggt häbb, um ihm mit eme eisichtige Nigge zu signalisiere, dass e‘n verstanne häbb, war er verschwunne. Bloß d’Sonn hot mer noch zuzwinkert un versproche, dass se’s em Kolleg weitergebbt, wenn se’n sieht.
Un d’Rechnung war halt die vun eme ehemolige Sternerestaurant…
Do kannsch mol sehe! Des hättsch vor 60 Johr beim Auswennichlerne net gedenkt, dass Dir die Verslen vom Matthias Claudius emol so en himmlische Hochzichdag beschere werre! Alles Gute für Euch zwoi beim nächschde Hochzichdag!